Rëndësia e rrjetëzimit për Startup-et dhe Marketerët!


*Nga Gerti Boshnjaku – Ceo i Business Magazine Albania

Ka mbi 2 vjet që jam aktiv në ndjekjen e eventeve të lidhura me startup-et, duke filluar nga Startup Grind Tirana, Albanian ICT Awards apo Startup Weekend e me rradhë. Për këtë duhet t’i them “Falemnderit” lançimit të Business Magazine Albania pikërisht në Janar të vitit 2015. Më pas si rrjedhim, krijuam një partneritet me Startup Grind Tirana, duke qenë se kuptuam se kishim mision të ngjashëm, për mbështetjen e sipërmarrjes së re dhe një rrugë të përbashkët drejt përmbushjes së këtij misioni.

Ka diçka të veçantë në këto tip aktivitetesh, sidomos Startup Grind, pa dashur të përjashtoj asnjë tjetër. Ndihet një frymë ndryshe komunikimi dhe ndërveprimi. Normalisht pasi kalon paksa momentet e para të ndrojes ngaqë nuk e njeh ambientin, kupton se aty ndodhesh në një mjedis Tëndin. Nuk është pronë e askujt, por gjithkush ndihet si në vendin e vet.

Prezantohesh, njeh njerëz të rinj, takon personazhe të njohur dhe të panjohur, bën pyetjet e tua, mëson, jep nga ajo që di në bashkëbisedim…disa e quajnë networking, por edhe shqip shkon mjaft bukur, rrjetëzim. Lidhemi me njerëz të cilët mbase i njohim si emra në faqet e Facebook apo LinkedIn, por që kurrë nuk kemi mundur të shkëmbejmë një përshëndetje njerëzore dhe një mendim mbi atë që bëjmë.

Përveç vlerësimit personal mbi komunikimin dhe rrjetëzimin, dua të theksoj rëndësinë që ka në aspektin profesional, rrjetëzimi, për startup-et e reja dhe marketerët.

Për Startup-et – Përfshirë sipërmarrjet në fazë ideje e më tej

Ka shumë persona që pretendojnë se kanë një ide, që mund të kthehet në një sipërmarrje të suksesshme. Mirëpo, çfarë të bëjnë me të?

Ajo që kam mësuar dhe duhet ta mësojnë të gjithë, është se ka shumë rrugë për të bërë pasi të kemi “një ide”. Ata që kanë një ide, duhet të mësojnë ta shprehin atë, ta ndajnë atë me njerëzit e tjerë, të marrin përshtypje dhe të kuptojnë se çfarë duhet të bëjnë më pas me këtë ide. Duke takuar njerëz të rinj, startup-et kanë mundësi të njihen me modele të reja zhvillimi biznesesh, programe përshpejtimi, mundësi trajnimesh apo financimi për t’i çuar idetë e tyre me tutje.

“Ndërsa të mësuarit nga gabimet tona është i rëndësishëm, nuk ka rrugë më efiçente se sa mësimi nga gabimi i të tjerëve. Të ecësh vetëm në këtë botë kaq të madhe nuk është zgjedhja më e mirë.” – themeluesi i Verbalizeit Ryan Frankel.

Dhe, duke folur nga përvoja personale, horizonte të reja do t’ju hapen, dhe kjo është shumë e rëndësishme për një sipërmarrës të ri, apo edhe me përvojë.

“Askush nuk mund t’ia dalë i vetëm” – është shprehur Alen Saqe, CEO i kompanisë Dentem, një startup-i shqiptar që po zhvillohet mrekullisht në Shqipëri dhe jashtë saj duke ndjekur modelin e zhvillimit të një startup-i me përpikmëri.

Dhe përveç Dentem, në aktivitetet e rrjetëzimit mund të njihesh me kompani të tjera, që janë në faza te ndryshme progresi, për të cilat mund të japësh diçka në formë ndihme nga përvoja personale, apo mund të marrësh frymëzim dhe njohuri nga rruga e atyre që janë duke pasur sukses.

Përse është thelbësor rrjetëzimi për Marketerët

Disa do të mendojnë se e kam fjalën tek shitja. Mund të kuptojnë se në këto takime do të mund t’i shesësh produktin apo shërbimin tënd disa njerëzve të tjerë që takon.

Jo. Jo dhe jo…Nuk është synim shitja në këto aktivitete, madje personalisht kam këndvështrim tjetër për marketingun. E lidh më shumë me një orientim apo stil menaxhimi të kompanisë se sa me një funksion bazik shitjeje.

Siç e shoh unë, marketingu përgjigjet për të kuptuar mjedisin, hapësirën midis klientit të synuar dhe kompanisë dhe të kujdeset të krijojë mekanizmat që kuptojnë klientin në 360 gradë dhe përgatisin një produkt / shërbim që i plotëson nevojat /dëshirat konsumatorit, në kohën që i duhen; në të njëjtën kohë sigurohet që të ketë dukshmëri maksimale të produktit / shërbimit dhe konkurueshmëri nëpërmjet vlerës që ofron në treg. Shitja është “hapi i fundit” për të cilin marketing ka ndikim por nuk është përgjegjësi i vetëm.

Ndaj edhe rrjetëzimin e shoh si proçes të marketingut, sepse duke qenë mes njerëzve të ngjashëm, pra profesionistëve, ne mund të diskutojmë dhe testojmë idetë tona, të kuptojmë nevojat e kohës, mekanizmat apo teknologjitë që po vijnë, ndikimin e tyre në jetën tonë, sjelljet dhe qëndrimet tona. Është rast ku ne mund të jemi të dukshëm dhe me diskutimet tona, të kuptohet se cilët jemi dhe çfarë përfaqësojmё, por jo me objektivin për të shitur diçka aty…jo se është turp. Shitja është objektiv final i një transaksioni, por nuk duhet të jetë objektivi i pranisë tonë në një event.

Lexoni: Mjeshtëria e shitjes (10): Pesë pikat e prezantimit të produktit

Parimi më i mirë është “Të japësh para se të marrësh”. Këtë parim ndan Startup Grind dhe unë e mbështes me besimin se kështu është forma më e mirë e një ndërveprimi funksional dhe jetëgjatë. Ndaj evente të tilla kanë lindur prej vitesh në vendet në zhvillim dhe po shtrihen në tё gjithë botën, duke frymëzuar dhe motivuar njerëzit anekënd drejt sipërmarrjes.

Ndaj miq, si hap i parë, aktivizoni një kalendar në telefonin apo laptopin tuaj, regjistrohuni në eventet ku besoni se fokusi i tyre ka të bëjë me profesionin tuaj apo qoftë edhe me një pasion dhe i shtoni në kalendar.

Më besoni se është një përvojë që do ia vlejë!

Miqësisht, Gerti

P.S. Një Listë me aktivitete të ndryshme mund ta gjeni në Linket e mëposhtme të Business Magazine Albania.

 

Must watch
Business Mag Nr. #23 - Qershor 2020

Të gjitha planet tuaja për këtë vit, si individë apo sipërmarrës mund të jenë përmbysur. Mbërritja e Coronavirusit në Shqipëri paralizoi gjithçka, ashtu si kudo. Në mënyrë të papritur na vuri në kushte tërësisht të tjera pune, na shtoi pasigurinë e shqetësimin për të ardhmen.

Sipërmarrjet, kryesisht në fushën e IT u përshtatën më shpejt, duke angazhuar punonjësit nga shtëpia. Ato zhvilluan dhe më tej mundësitë për të punuar në distancë, ndërkohë që shumë kompani të tjera u mbyllën plotësisht.

Kjo është një periudhë sprove, për individin, drejtuesit dhe liderin. Kjo është lufta që po zhvillohet në spitale dhe fronti i parë i saj janë mjekë, infermierë e sanitarë. Historia e ekonomisë k a treguar se gjithmonë pas një situatë të vështirë ka një ringritje. Dhe ne besojmë se kështu do të jetë.

Deri atëhërë ajo çka na mbetet të bëjmë është respektimi i rregullave të kërkuara, marrja e përgjegjësive ndaj të tretëve për aq sa mundemi, e të interesohemi për të pamundurit, të ndajmë diçka për ta.

Solidariteti nuk ka munguar e nuk do të na mungojë as kësaj radhe. Ajo çfarë doli në pah krahas solidaritetit ishte varfëria: e shtetit, e kompanive dhe e vetë individëve.

Një ditë pas dërgimit të 30 bluzave të bardha në Itali, The Guardian na vlerësoi në artikullin e saj si zemërgjerë edhe pse Ky numër ishte planifikuar të botohej në Prill 2020, por procesi u shty për shkak të masave të ndërmarra si pasojë e shpërthimit të Covid-19. Edhe pse në kohë vështirësish, jemi …

Shiko më shumë
Na ndiqni në rrjetet sociale