Shqipëria është ngjitur në renditjen e saj në ‘Indeksin Global të Ekosistemit së Startup-eve’ për vitin 2023, i publikuar nga ‘Startup Blink’. Renditja globale tregon se vendi ynë është pozicionuar në vend të 74-tët, duke fituar 1 pozicion krahasuar me edicionin e vitit 2022, i cili e rendiste në vend të 75-të. Ky indeks synon të nxjerrë në pah vendet më të mira për fillimin e bizneseve. Gjithashtu, tregon se ku ekzistojnë bashkësitë më të lulëzuara të sipërmarrjeve dhe rendit ekosistemet fillestare të mbi 1000 qyteteve dhe 100 vendeve.
Sipas raportit, Shqipëria përmirësoi renditjen e saj me 1 pozicion, duke përfituar nga rënia e Bjellorusisë. Në mënyrë të ngjashme, Shqipëria u përmirësua me 1 vend duke u renditur e 19-ta në Europën Lindore dhe vazhdon të ruajë pozicionin si e 9-ta në renditje mes vendeve të Ballkanit.
Ekosistemi i vetëm shqiptar i renditur në këtë indeks, Tirana, pati një fitim modest prej 2 vendesh në Indeks dhe pozicionohet e 459-ta në nivel global. Tirana ruajti pozicionin e saj si ekosistemi i 35-të në Europën Lindore dhe e 12-ta në Ballkan. Sipas raportit, edhe pse tendencat e këtij viti janë pozitive, Shqipëria ka potencial për të performuar më mirë se kaq.
Po ta fokusojmë analizën vetëm ne vendet e Ballkanit Perëndimor shohim se Serbia dhe Maqedonia e Veriut qëndrojnë para nesh në renditje në vend të 51-të dhe 70-të, ndërkohë që kemi lënë pas Bosnje Hercegovinën e pozicionuar në vend të fundit, pra në vend të 100-të, për vitin 2023. Kosova për këtë edicion ka dalë nga renditja, ndërkohë një vit më parë ishte e vendosur në vend të 96-të. Në vend të parë në rang global në këtë indeks renditen vende si Shtetet e Bashkuara të Amerikës, Mbretëria e Bashkuar, Izraeli, Kanadaja, Suedia dhe Singapori.
Në raport thuhet se ekosistemi i bizneseve në Shqipëri është ende në fazat e hershme, megjithatë ka përpjekjet e sektorit publik dhe privat për të nxitur zhvillimin e startup-eve dhe sipërmarrjes. Mes rrjeshtash thuhet se Shqipëria ka një bazë talentesh premtuese në fushën e teknologjisë dhe komuniteti lokal i startup-eve është plot entuziazëm duke ofruar sisteme të ndryshme mbështetëse me ndihmën e organizmave ndërkombëtare si BERZH apo edhe të tjera. Për më tepër, raporti tregon se Ministria e Shtetit për Sipërmarrjen është një organ qeveritar që synon të ndihmojë sipërmarrjen në vend.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
