Qeveria ka njoftuar një sërë vendimesh të reja që prekin zhvillimin vendor, reformën territoriale, sportin dhe turizmin, gjatë një deklarate për mediat të mbajtur ditën e sotme nga ministri i Pushtetit Vendor Ervin Demo dhe ministri i Kulturës Blendi Gonxhja.
Sipas ministrit të Pushtetit Vendor, Ervin Demo, katër bashki të tjera në vend kanë miratuar zonat prioritare në kuadër të “Paketës së Maleve”, duke e çuar në 40 numrin total të bashkive që janë bërë pjesë e kësaj nisme. Ai theksoi se interesi për programin po rritet si nga aplikantët brenda vendit, ashtu edhe nga shqiptarët që jetojnë jashtë, por kanë lidhje me zonat rurale.
Demo shtoi se procesi i miratimeve në këshillat bashkiakë do të vijojë, ndërsa pritet që një pjesë e mirë e bashkive të përfundojnë procedurat në periudhën në vijim.
Në lidhje me reformën territoriale, ministri u shpreh se diskutimi duhet të jetë më i gjerë se numri i bashkive dhe të fokusohet te funksionimi i tyre. Sipas tij, është e rëndësishme që bashkitë të fuqizohen dhe të ofrojnë shërbime më cilësore për qytetarët. Ai bëri të ditur se deri në fund të muajit maj do të përmbyllet një tur konsultimesh me aktorë të ndryshëm për këtë proces.
Lexo edhe: Shqipëria në epokën Gigabit, ligji që synon t’i japë fund kaosit kabllor
Nga ana e tij, ministri i Kulturës Blendi Gonxhja njoftoi rritje të mbështetjes për sportistët profesionistë, duke deklaruar se pagesa ditore për ta do të rritet në 5 mijë lekë. Ai tha se skema e re synon një shpërndarje më të drejtë të mbështetjes dhe rritjen e performancës së sportistëve shqiptarë në arenën ndërkombëtare.
“Do të rrisim mbështetjen për sportistët profesionistë. Mbështetja në ditë do të shkojë në 5 mijë lekë. Garantojmë një skemë më të drejtë, për të pasur një promovim të iomazhit të Shqipërisë dhe për të promovuar gjithmonë e më shumë sportistë, që të luftojnë për rezultate sa më të larta. Kemi dyfishim të shpërblimeve për lojërat olimpike dhe kampionatet botërore. Ka përmirësim të ndjeshëm në ndihmë, në paketën e mbështetjes, që e kemi përcaktuar bashkë me Ministrinë e Financave.”, tha Gonxhja.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
