Qeveria shqiptare ka vënë në qendër të agjendës sigurinë ushqimore, duke e cilësuar atë si një nga sfidat më të rëndësishme në procesin e integrimit evropian. Gjatë një takimi me operatorët e biznesit ushqimor, Kryeministri Edi Rama deklaroi se Shqipëria do të synojë zbatimin e standardeve të Bashkimit Europian në të gjithë zinxhirin ushqimor.
Në takim mori pjesë edhe ambasadori i BE-së në Tiranë, Silvio Gonzato, i cili theksoi rëndësinë e ngritjes së laboratorëve modernë dhe të saktë, që do të garantojnë kontrollin e cilësisë së produkteve ushqimore dhe rritjen e besimit të konsumatorit.
Sipas drejtuesve institucionalë, Shqipëria po punon për ngritjen e një sistemi të plotë gjurmueshmërie dhe kontrolli, që nga prodhuesi deri te konsumatori, duke përfshirë standardizimin e thertoreve, sektorin e qumështit dhe forcimin e infrastrukturës laboratorike.
Ministrja e Shtetit dhe Kryenegociatorja, Majlinda Dhuka, theksoi se procesi i harmonizimit me BE-në nënkupton që konsumatori shqiptar të ketë të njëjtin nivel sigurie si ai europian, si për produktet vendase ashtu edhe për ato të eksportit. Ajo njoftoi gjithashtu nisjen e skanimit të mbi 900 subjekteve ushqimore.
Lexo edhe: Transporti 2030, një strategji mes mundësisë dhe riskut të zbatimit
Nga ana e tij, Kryeministri Rama deklaroi se siguria ushqimore mbetet një “sfidë vendimtare” për integrimin në BE, duke paralajmëruar kontrolle të plota mbi bizneset që nuk përmbushin standardet. Ai theksoi se procesi nuk synon penalizimin, por rritjen e cilësisë dhe formalizimin e tregut ushqimor.
Rama nënvizoi gjithashtu se Shqipëria do të mbështetet në bashkëpunimin me institucionet europiane për të forcuar kapacitetet vendase dhe për të përshpejtuar përafrimin me standardet e BE-së në sektorin e ushqimit.
Sipas qeverisë dhe përfaqësuesve të BE-së, siguria ushqimore po kthehet në një element kyç jo vetëm për shëndetin publik, por edhe për rritjen e mundësive të eksportit dhe investimeve në sektorin agroushqimor.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
