Sipas Forumit Ekonomik Botëror (WEF), miliona vende pune mund të zhduken ose të krijohen gjatë viteve të ardhshme. Kjo ndodh për një sërë arsyesh, nga përparimet teknologjike deri te ndryshimet klimatike. E sigurt është që shumë punonjës do të duhet të përshtaten.
Për këtë arsye, aftësitë për të përballuar këto ndryshime dhe për të përmbushur kërkesat e reja të punës janë thelbësore.
Në raportin e fundit “Future of Jobs”, WEF identifikon cilat aftësi janë kyçe tani dhe cilat do të bëhen të domosdoshme në vitet e ardhshme. Ky raport bazohet në një anketim të 803 kompanive nga 27 industri në 45 ekonomi të ndryshme.
Aftësitë analitike dhe mendimi krijues janë ndër më të kërkuarat nga kompanitë. Të qenit elastik, i shkathët, i motivuar, kureshtar dhe i përkushtuar ndaj mësimit gjatë gjithë jetës janë gjithashtu aftësi kyçe.
Një aftësi teknologjike, edukimi teknologjik, renditet në vendin e gjashtë, ndërsa aftësia për të kuptuar dhe përdorur inteligjencën artificiale është në vendin e 15-të. Kjo renditje reflekton ndryshimet nga sondazhi i fundit i vitit 2020.
“Krahasimet me sondazhet e mëparshme sugjerojnë se të menduarit krijues po bëhet gjithnjë e më i rëndësishëm në krahasim me të menduarit analitik, pasi detyrat në vendin e punës bëhen gjithnjë e më të automatizuara”, thuhet në raport.
Në vitin 2018 dhe 2020, mendimi analitik ishte konsideruar më i rëndësishëm sesa mendimi krijues me diferenca prej 35% dhe 38%, respektivisht. Ky hendek tani është ulur në 21% dhe mund të vazhdojë të ulet.
Priten ndryshime të mëtejshme për aftësitë më të kërkuara në punë. “Punëdhënësit vlerësojnë se 44% e aftësive aktuale të punonjësve nuk do të jenë më të nevojshme gjatë pesë viteve të ardhshme”, thuhet në raport.
Mendimi krijues pritet të rritet më së shumti në rëndësi, ndjekur nga mendimi analitik dhe edukimi teknologjik. Ky i fundit është veçanërisht i rëndësishëm, pasi zhvillimet teknologjike do të jenë një shtytës kryesor i krijimit të vendeve të reja të punës dhe zhdukjes së atyre ekzistuese.
Aftësitë e buta si kurioziteti, të mësuarit e vazhdueshëm, elasticiteti dhe shkathtësia do të bëhen gjithnjë e më jetike për punonjësit. Në anën tjetër, aftësitë fizike mund të jenë më pak të rëndësishme në të ardhmen.
“Ndërsa të anketuarit vlerësuan se asnjë aftësi nuk ishte në rënie neto, pakica të konsiderueshme kompanish gjykojnë se leximin, shkrimin dhe matematikën; shtetësinë globale; aftësitë përpunuese shqisore; shkathtësinë, qëndrueshmërinë dhe saktësinë manuale do të jenë me rëndësi në rënie për punonjësit e tyre”, thuhet në raport.
Këto janë 10 aftësitë më të rëndësishme për punonjësit këtë vit, sipas raportit të WEF:
- Mendimi analitik
- Mendimi krijues
- Rezistenca, elasticiteti dhe shkathtësia
- Motivimi dhe vetëdija
- Kureshtja dhe të mësuarit gjatë gjithë jetës
- Edukimi teknologjik
- Besueshmëria dhe vëmendja ndaj detajeve
- Empatia dhe dëgjimi
- Udhëheqja dhe ndikimi shoqëror
- Kontrolli i cilësisë
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
