Në një ekosistem ku shumica e startupeve mbyllen përpara se të arrijnë pjekurinë, të mbijetosh për 10 vite është më shumë sesa sukses, është dëshmi këmbënguljeje. Baboon Delivery, një nga platformat e para teknologjike të delivery-t në Shqipëri, feston këtë vit një dekadë aktiviteti në tregun shqiptar, duke u kthyer në një rast studimi për sipërmarrjen vendase.
E themeluar me një vizion të qartë për të ndërtuar një zgjidhje made in Albania, Baboon u lançua në një kohë kur tregu digjital ishte ende në hapat e parë. Në vitet e para, smartphone-t nuk ishin masivë, pagesat online pothuajse inekzistente dhe besimi ndaj shërbimeve teknologjike lokale ishte i kufizuar. Megjithatë, Baboon zgjodhi të investojë herët në teknologji, logjistikë dhe mbi të gjitha, në njerëz.
“Baboon nuk lindi si një ide e përkryer biznesi, por si një besim se edhe në Shqipëri mund të ndërtohen produkte teknologjike që funksionojnë dhe zgjasin”, shprehet bashkë themeluesi dhe CEO, Genti Selenica.
Një dekadë sfidash reale
Rrugëtimi i Baboon nuk ka qenë linear. Kompania ka kaluar disa nga periudhat më të vështira për ekonominë dhe shoqërinë shqiptare: tërmetin e vitit 2019, pandeminë globale, protesta të vazhdueshme, mot ekstrem etj. Në çdo situatë, fokusi ka qenë i njëjtë: vazhdimësia e shërbimit dhe mbështetja e komunitetit.Një rol kyç në këtë qëndrueshmëri ka pasur rrjeti i motoristëve, partnerët restorante dhe stafi operativ, të cilët kanë mbajtur gjallë shërbimin edhe në kushtet më të vështira. Gjatë këtyre 10 viteve, mijëra persona kanë punuar apo bashkëpunuar me Baboon, duke e kthyer platformën në një nga punëdhënësit më fleksibël në sektorin e shërbimeve urbane.
Teknologji, por mbi të gjitha kulturë
Ndërsa Baboon ka investuar vazhdimisht në inovacion, nga pagesat online te gjurmimi live i porosive dhe optimizimi i logjistikës, diferenca kryesore ka qenë kultura e brendshme. Një kulturë ku përgjegjësia, reagimi i shpejtë dhe përmirësimi i vazhdueshëm janë bërë pjesë e ADN-së së kompanisë.
“Kemi bërë gabime, kemi mësuar shpejt dhe kemi ecur përpara. Në fund, ajo që na ka mbajtur bashkë ka qenë besimi mes njerëzve”, thekson Selenica.
Një histori që vazhdon
Sot, Baboon Delivery është pjesë e përditshmërisë së mijëra përdoruesve dhe një shembull se si një startup shqiptar mund të rritet, të përshtatet dhe të mbijetojë në një treg sfidues. 10-vjetori nuk shihet si fund i një cikli, por si një pikë reflektimi për atë që është ndërtuar dhe për atë që vjen më pas. Në një realitet ku shumë të rinj shqiptarë kërkojnë mundësi jashtë vendit, historia e Baboon Delivery mbetet një mesazh i qartë: edhe këtu mund të ndërtohen biznese që zgjasin, nëse vizioni shoqërohet me këmbëngulje dhe njerëz të duhur.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
