Startups.al, një nismë për Komunitetin nga Komuniteti


Albi Zhulali është një sipërmarrës, i cili e nisi karrierën e tij në industrinë e internetit në moshën 15 vjeçare. Shumë shpejt ai krioi një forum ndërkombëtar që vizitohej nga qindra mijëra ndjekës nga e gjithë bota.

Në moshën 17 vjeçare, Albi themeloi kompaninë e tij të parë për zhvillim faqesh interneti me klientë disa nga kompanitë më të mëdha në Shqipëri. Ai ështe themelues i Pinguin Technology dhe i Startups.al.

Sfida e tij e madhe e momentit, është sipërmarrja e tij më e re, e cila mban emrin Sofmogul.

Startups.al po lidh kontratë me një kompani investimesh në Berlin.

Kjo marrëveshje ka në thelb mundësinë e identifikimit të startup-eve shqiptare me shanse zhvillimi përtej kufijve të Shqipërisë dhe ofrimit të investimeve për t’i çuar ato më tej si biznese në tregun ndërkombëtar.

Çfarë është Startups.al?

Në Shqipëri çdo ditë e më shumë, po rritet fryma e sipërmarrjes nga të rinjtë, kjo falë shumë eventeve të mirë organizuara. Kam patur fatin të marr pjesë në shumicën prej tyre dhe janë vërtet vende ku mund të mësosh shumë dhe të krijosh lidhje të reja për të të ndihmuar në sipërmarrjen tënde. Gjithashtu, organizohen dhe evente ku nxisin nisjen e një startup-i në 3 ditë. Në këto evente lindin shumë ide dhe startup-e të reja po për të cilat, shumë pak njerëz i kanë dëgjuar. Kështu lindi edhe Startups.al.

Startups.al është komuniteti i parë online i Startup-eve në Shqipëri. Ne duam të nxisim çdo startup në cilëndo fazë të zhvillimit që mund të jetë, të listohet tek ne. Në këtë mënyrë të gjithë do të jemi të mirë informuar se çfarë ndodh në këtë komunitet, i cili rritet kaq shpejt. Këtu kemi mundësinë të zbulojmë startup-e të reja të cilat akoma nuk kanë arritur majat e suksesit që t’i njohin të gjithë. Dhe pse lindi, me një ide kaq të thjeshtë “Databaza e startup-eve në Shqipëri” tashmë Startups.al po shikon dhe fusha të tjera zhvillimi. Ne synojmë të bëhemi një komunitet online, ku të rinjtë të cilët ia kanë dalë të bëjnë sipërmarrjen e tyre të sukseshme, të ndihmojnë të rinjtë e tjerë për të arritur sukses më shpejt duke mënjanuar gabimet që ato kanë bërë.

Çfarë zgjidhje ofron Startups.al dhe kujt i shërben?

Startups.al është një komunitet , i cili i shërben çdo personi që dëshiron të angazhohet në botën e startup-eve. Nuk ka rëndësi nëse është themelues apo një i ri i cili dëshiron që kohën e tij ta ndajë me një kompani të re.

Është një vend ku i jep mundësi çdo startup-i, të ketë një prezencë në një komunitet, të njihet me startup-e të tjera, të mësojë nga ato që kanë arritur sukses si dhe të gjejë talente të reja për t’i bashkuar në nismën e tij. Unë besoj të gjithë ata të rinj që kërkojnë të zhvillojnë ide të reja inovatore në Startups.al do të gjejnë të gjitha burimet për të arritur qëllimin e tyre.

Si e shikoni komunitetin e startup-eve në Shqipëri? Sipas jush a ka zhvillim? Çfarë mund të presim nga ky zhvillim?

5 vjet me parë, fjala startup nuk njihej në Shqipëri, ndërsa sot e dëgjojmë të flitet në çdo vend. Sigurisht që ka zhvillim, madje një zhvillim shumë të shpejtë. Unë përfytyroj një botë perfekte ku zgjidhja e çdo problemi vjen nga një startup. Nuk ka më justifikime për të rinjtë të cilët nuk gjejnë dot punë në një kompani të madhe, mjafton të kërkojnë për një problem dhe të krijojnë një zgjidhje për të. Nuk janë të pakta rastet ku startup-e të reja kanë shkatërruar kompani të mëdha dhe këtë gjë e shoh të ndodhë dhe në Shqipëri shumë shpejt.

Startups.al “erdhi në jetë” në Tetor 2015. Ku e shikoni atë në Tetor 2016? A do të ndryshojë botën?

Kemi filluar komunikimet me disa firma investimesh në Europë për të bashkëpunuar me ne. Startups.al, e shohim si një urë lidhëse mes startup-eve inovatore në Shqipëri me investitorët e huaj për të bërë të mundur zhvillimin e tyre përtej kufijve. Ne jemi një nismë për komunitetin nga komuniteti. Startups.al nuk do të kishte sukses nëse nuk do të bashkëpunonte me të gjithë dhe të gjithë të bashkëpunonin me të. Startups.al nuk do të ndryshojë botën por startup-et e komunitetit tonë do të ndryshojnë Shqipërinë, pse jo edhe botën.

Këshila jote për startup-et e reja.

Ekziston një koncept i gabuar në shoqërinë tonë që nuk duhet ta ndash idenë tënde me të tjerët sepse ta marrin. Këshilla që kam për sipërmarrësit e rinj, është ta fshijnë këtë koncept nga mendimet e tyre; idenë e tyre duhet ta komunikojnë me sa më shumë njerëz. Vetëm në këtë mënyrë do të kuptojnë nëse zgjidhja e tyre është e nevojshme për përdoruesit.

Intervista u mor nga faqa 11, nr. 7 i periodikes Business Magazine Albania. Për ta shfletuar të plotë revistën klikoni këtu

Must watch
Business Mag Nr. #24 - Tetor 2020

Numri 24 i revistës Businessmag.al sjell një panoramë të zhvillimeve, përshtatjeve dhe ecurisë në sektorë të ndryshëm të ekonomisë. Në të njëjtën kohë, shohim zhvillime relativisht të kënaqshme.  Organizime të reja si Dhoma Ekonomike e Gruas, duket si një shpresë për më shumë zë, lobim dhe mbështetje për gratë sipërmarrëse dhe sipërmarrjet e reja.

Gjatë kësaj periudhe angazhime si programi “Ringrihu më i fortë”, ishin një lloj kundërpërgjigje ndaj dëmeve ekonomike që po shkakton pandemia.

Influencerat vijojnë të rrisin hapësirat e tyre dhe janë bërë një instrument i rëndësishëm marketimi. Në brendësi të revistës do të gjeni renditjen e top 100 influencerave më të mëdhenj në vend.

Gjatë kësaj vere ndërkohë, vetë Businessmag pati një fushatë të suksesshme të promovimit të turizmit shqiptar. Qindra të rinj u angazhuan të dërgojnë foto dhe përshkrimet e vendeve të ndryshme të Shqipërisë.

Shiko më shumë
Na ndiqni në rrjetet sociale