Për periudhën 2014-2015, numri i përfituesve ( për të dy vitet bashkë) ishte 96.
Sipërmarrjet përfituese i përkasin kryesisht sektorëve, si: agro-përpunimi, plastika, druri, ICT, fasoni tekstil, artizanati dhe turizmi i cili promovon produktet “Made in Albania”. Të dhënat bëhen të ditura nga Agjencia e Zhvillimit të Investimeve (AIDA), e cila ka si detyrë zbatimin e skemave me qëllim mbështetjen kryesisht të bizneseve që ekportojnë, për të rritur konkurrueshmërinë e tyre, për të forcuar kapacitetet prodhuese, si dhe për t’i ndihmuar me daljen në treg.
Skemat financiare janë: Fondi Shqiptar i Konkurrueshmërisë, Fondin e Inovacionit , Fondin e Ekonomisë Kreative (Artizanatit), Fondin Startup, Skema “Voucher” dhe Fondi i Grave Sipërmarrëse. Nga këto fonde shtetërore mund të përfitojë çdo ndërmarrje e vogël dhe e mesme që i përkasin veçanërisht sektorit prodhues. Deri tani bizneset që kanë përfituar i përkasin qarqeve kryesore të vendit si: Vlora, Durrësi, Shkodra, Gjirokastra, Korça, Berati dhe Elbasani.
Fondet nën menaxhimin e AIDA-s
Fondi i Konkurrueshmërisë
Është një nga fondet që operon për të katërtin vit radhazi pranë Agjencisë Shqiptare të Zhvillimit të Investimeve (AIDA). Qëllimi i fondit është të ndihmojë kompanitë shqiptare të depërtojnë me produktet e tyre në tregje të huaja duke siguruar mbështetjen e nevojshme financiare për aktivitete që do të ndihmojnë në zbatimin e planit të tyre për eksport. Shuma maksimale që mund të përfitojë një subjekt është 1.400.000.
Fondi i Ekonomisë Kreative
Ka për qëllim zhvillimin e sektorit të artizanatit dhe zejtarisë në Shqipëri, duke krijuar një mjedis të favorshëm për aktivitete më të qëndrueshme ekonomike dhe krijimin e vendeve të reja të punës. Shuma maksimale që mund të përfitojë një subjekt është 500,000 lekë.
Fondi në Mbështetje të Grave Sipërmarrëse
Është një nga fondet e reja që AIDA menaxhon këtë vit. Qëllimi i tij do të jetë rritja ekonomike e sipërmarrjeve femërore duke nxitur investimet e reja nëpërmjet rritjes së financimeve nga institucionet financiare jo-bankare dhe shoqëritë e kursim-kreditit. Shuma maksimale që mund të përfitojë një subjekt është 100,000 lekë.
Fondin në Mbështetje të Sipërmarrjeve të Reja “Startup”
Është fondi tjetër i ri, i cili ka për qëllim mbështetjen e bizneseve të sapo krijuara “Startup” në Shqipëri, nëpërmjet subvencionimit financiar të drejtpërdrejtë duke përmirësuar klimën dhe kushtet operuese të tyre, me synim krijimin e bazave për një zhvillim ekonomik të qëndrueshëm, si dhe krijimin e vendeve të reja të punës. Shuma maksimale që mund të përfitojë një subjekt është 300,000 lekë.
Fondi i Inovacionit
Për të gjitha ndërmarrjet SME, që janë të interesuara që të avancojnë linjën e tyre teknologjike. Shuma maksimale që mund të përfitojë një subjekt është 400,000 lekë.
Fondi në mbështetje të turizmit
Synohet stimulimi i ndërmarrjeve mikro të vogla dhe të mesme që ushtrojnë aktivitet në zonat turistike/ historike, për t’iu mundësuar atyre mbështetje financiare për investime kapitale në ambientet e ushtrimit të aktivitetit.
Fondi u jep ndihmë, në formë granti të drejtpërdrejtë SME-ve nëpërmjet bashkëfinancimit. Fondi mbulon deri në 50 % të kostove të pranueshme, por jo më shumë se 3,000,000 leke.
burimi: Monitor
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
