Punonjësit janë gjithnjë e më shumë në kërkim të një mjedisi pune që t’i japë përparësi shëndetit të tyre mendor dhe të promovojë ekuilibrin mes jetës profesionale dhe asaj personale.
Ky ndryshim i pritshmërive rreth mirëqenies në vendin e punës ka ndikuar në qëndrimet e punonjësve individualë për punën. Por ndikon edhe në parametra të rëndësishëm të biznesit si produktiviteti, mbajtja e punonjësve dhe angazhimi.
1.Vendosni tonin
Stigma që rrethon shëndetin mendor është një pengesë e rëndësishme në kërkimin e ndihmës, por nuk duhet të jetë. Edhe pse lufta ndaj kësaj ndihme kërkon përpjekje afatgjatë, këtë vit mund të bëni hapa të vegjël për të krijuar një kulturë pune më përfshirëse dhe të ndjeshme.
Për të nxitur biseda më të hapura mbi shëndetin mendor në vendin e punës, këtë vit, drejtuesit duhet të vendosin tonin, duke promovuar në mënyrë aktive një mjedis pune pranues dhe mbështetës.
Ata duhet të diskutojnë hapur mbi shëndetin mendor dhe rëndësinë e tij, nëse duan që punonjësit të ndihen të sigurt për të bërë të njëjtën gjë. Kur drejtuesit e pranojnë hapur rëndësinë e shëndetit mendor, dërgojnë një mesazh të fuqishëm se kërkimi i mbështetjes është jo vetëm i pranueshëm, por edhe i nxitur.
2.Ofroni mundësi për të përmirësuar ekuilibrin punë-jetë
Një aspekt kritik i ruajtjes së shëndetit të mirë mendor është ekuilibri punë-jetë. Nxisni më shumë ekuilibër këtë vit, duke ofruar orare fleksibël, mundësi pune në distancë dhe ditë pushimi të paguara për kujdesin ndaj vetes.
Kur punonjësit mendojnë se kanë kontroll mbi orët e tyre të punës dhe mund të balancojnë jetën e tyre personale, ata kanë më shumë të ngjarë ta menaxhojnë më mirë stresin dhe të ruajnë mirëqenien.
3.Përcaktoni dhe komunikoni qartë politikat
Nuk është e mjaftueshme të thoni se punonjësit mund të marrin një “ditë të shëndetit mendor” nëse kanë nevojë. Organizatat duhet të ofrojnë politika dhe procedura të përcaktuara qartë në lidhje me shëndetin mendor.
Komunikimi i hapur dhe i qëndrueshëm është gjithashtu çelësi për një kulturë të shëndetshme. Sigurohuni që t’i mbani punonjësit të informuar për burimet e shëndetit mendor, mbi ngjarjet e ardhshme dhe nismat e vazhdueshme për vitin 2024.
4.Investoni në trajnime mbi shëndetin mendor
Investimi në trajnimin e shëndetit mendor të menaxherëve mund të bëjë ndryshim thelbësor në mirëqenien emocionale të punonjësve tuaj këtë vit (dhe jo vetëm).
Ju gjithashtu mund të kërkoni edhe një partner për shëndetin mendor që mund të bashkëpunojë me ju për të bërë trajnime të personalizuara dhe/ose fushata ndërgjegjësimi për të nxitur biseda më të hapura rreth shëndetit mendor në vendin tuaj të punës.
5. Ngrini zërin e punonjësve
Sondazhet anonime janë një mjet i vlefshëm për vlerësimin e mirëqenies së punonjësve. Ato ndihmojnë në vlerësimin e efikasitetit të nismave të kaluara të shëndetit mendor dhe japin rezultate që mund të informojnë mbi përmirësimet për vitin e ardhshëm. Sondazhet gjithashtu i lejojnë punonjësit të shprehin shqetësimet, duke i bërë ata të ndihen të dëgjuar dhe të vlerësuar.
6.Jepni mirënjohje dhe shpërblime
Njihni dhe shpërbleni punonjësit që po ndihmojnë aktivisht në një kulturë të shëndetshme mendore. Por bëjeni këtë në një mënyrë që të jetë e pëlqyeshme për punonjësit (për shembull, disa njerëz parapëlqejnë t’u njihen meritat privatisht se sa publikisht).
Festoni akte të vogla mirësie dhe mbështetjeje për të nxitur një kulturë mirënjohjeje dhe vlerësimi gjatë gjithë vitit.
Ndërtimi i një kulture të shëndetshme mendore është një rrugëtim i vazhdueshëm.
Por nëse në vitin 2024 do të angazhoheni vazhdimisht për t’i dhënë përparësi mirëqenies së punonjësve tuaj, mund të krijoni një forcë pune më të lumtur dhe të shëndetshme dhe të nxisni ekipe më të angazhuara dhe produktive./ Forbes
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
