Rritja e sektorit të turizmit në dy vitet e fundit po i jep shtysë edhe tregut të qirasë financiare. Portofoli i qirasë financiare u rrit me ritme dyshifrore për të dytin vit radhazi në 2022, ndërsa sipas aktorëve të tregut, zgjerimi ka qenë edhe më i lartë në pjesën e deritanishme të këtij viti
Tregu i qirasë financiare (leasing-ut) u rrit me ritme më të shpejta vitin e kaluar.
Sipas shifrave të Bankës së Shqipërisë dhe të bankave tregtare të angazhuara në këtë produkt, portofoli i qirasë financiare në fund të vitit 2022 arriti vlerën e 11.7 miliardë lekëve, ose rreth 103 milionë eurove.
Vlera e portofolit u rrit me 10.6% krahasuar me vitin 2021. Ritmi i rritjes vjetore vitin e kaluar ishte i përafërt me rritjen e vitit 2021.
Turizmi dhe aktivitetet e lidhura me të po shënojnë rritje të shpejtë e cila po i jep efektet e veta anësore edhe në sektorët financiarë të lidhur me të.
Një nga bizneset kryesore që kanë mbështetur rritjen e leasing-ut në vitet e fundit është ai i makinave me qira, i lidhur drejtpërdrejt me shtimin e numrit të turistëve të huaj.
Ndikimi i turizmit në mënyrë të tërthortë është shtrirë edhe në sektorë të tjerë. Turizmi ka rritur kërkesën për taksi dhe flotat e reja janë të orientuara drejt automjeteve elektrike.
Blerja e tyre përbënin gjithashtu një kontingjent të rëndësishëm të kërkesës për financime me leasing.
Efekti i tërthortë i turizmit shtrihet edhe në sektorët e distribucionit dhe tregtisë, që kanë zgjeruar flotat e tyre të automjeteve.
Një segment tjetër në rritje është edhe ai i shërbimeve mjekësore, ku blerja ose rinovimi i pajisjeve po financohet në një masë të madhe me qira financiare.
Sipas Bankës së Shqipërisë, në tregun e qirasë financiare ushtrojnë aktivitet 11 institucione të licencuara për ofrimin e qirasë financiare.
Veç institucioneve financiare të veçanta, ky produkt ofrohet edhe nga disa banka tregtare në vend. Mbështetur në pasqyrat financiare, janë kryesisht Credins Bank dhe OTP Bank Albania që kanë vlera të rëndësishme të qirasë financiare në bilancet e tyre.
Disa prej tyre, fillimisht patën ngritur institucione të veçanta për qiranë financiare, por në vazhdim zgjodhën t’i mbyllnin këto institucione dhe ta përfshinin aktivitetin e leasing-ut brenda strukturave të bankës, me qëllim kryesisht uljen e kostove të aktivitetit.monitor
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto