Shpërblimi për informacion që çon në arrestimin e Ruja Ignatova, e njohur si “Mbretëresha e Kriptove,” është rritur në 5 milionë dollarë.
Ignatova, 44 vjeç, me origjinë gjermano-bullgare, është në kërkim nga FBI për mashtrimin e madh prej 4.5 miliardë dollarësh me kriptomonedhën OneCoin.
Ajo është zhdukur që prej vitit 2017, kur autoritetet amerikane lëshuan mandatin e arrestimit dhe nisën kërkimin për të.
Së fundmi, një podcast nga BBC, i publikuar tre javë më parë, zbuloi lidhjet e saj me botën e krimit të nëndheshëm bullgar, përfshirë një bos mafioz të dyshuar për zhdukjen e saj dhe ndoshta, vrasjen. Autoritetet vazhdojnë intensivisht kërkimin për Ignatova.
Lexo: Përditësoni në këtë formë CV-në tuaj për të qëndruar konkurrues në tregun e punës
Në vitin 2022, FBI e përfshiu në listën e 10 personave më të kërkuar, duke ofruar fillimisht një shpërblim prej 100 mijë dollarësh, që më vonë u rrit në 250 mijë dollarë. Të mërkurën, shuma u njëzetfishua në 5 milionë dollarë falë Programit të Departamentit të Shtetit për Shpërblimin e Krimit të Organizuar Ndërkombëtar.
“Ofrojmë një shpërblim deri në 5 milionë dollarë për informacione që çojnë në arrestimin ose dënimin e Ruja Ignatova, e njohur si ‘Mbretëresha e Kriptove’, për rolin e saj në një nga skemat më të mëdha të mashtrimit në histori,” deklaruan zyrtarët.
Ignatova është e vetmja grua në listën e më të kërkuarve të FBI-së.
Një shpërblim i ngjashëm ofrohet edhe për informacione që çojnë në kapjen e Daniel Kinahan, kreut të një prej kartelëve më të mëdhenj të drogës në Europë.
Po ashtu, shpërblime prej 5 milionë dollarësh janë caktuar për Semion Mogilevich, një bos krimi në Rusi, dhe Yulan Adonay Archaga Carías, i njohur si “Porky”, anëtari kryesor i grupit kriminal MS-13 në Honduras.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
