Numri 27 i revistës Businessmag, histori personazhesh, sipërmarrje, sfida dhe motivim - Business Magazine Albania

Numri 27 i revistës Businessmag, histori personazhesh, sipërmarrje, sfida dhe motivim

Numri 27 i revistës

Miq, lexues të BusinessMag,

Ky numër i revistës vjen në një sezon të nxehtë plot me zhvillime interesante në botën e startupeve. Jam i sigurt që secili nga ju është i ngarkuar shumë më tepër se në çdo periudhë tjetër në përpjekjet për të çuar gjërat përpara, ndaj ju falenderoj që po gjeni kohën për të lexuar këto rreshta. 

Dikush më pyeti, sa optimist je për të ardhmen? U përgjigja pa menduar, se kjo nuk është pyetje për një sipërmarrës. Ne optimizmin e kemi në gjak, pasi është stimuli kryesor që çon përpara iniciativat e çuditshme që ndërmarrim, shpesh pa u menduar gjatë! 

Këtë optimizëm përpiqemi ta sjellim në faqet në vazhdim nëpërmjet intervistave me personazhe të njohur dhe të panjohur, të cilët me punën e tyre të përditshme ndikojnë në jetën e mijëra njerëzve përreth. 

Me punën që bëjnë, me historitë që rrëfejnë mbi sfidat e ndryshme, mes dështimesh dhe suksesesh ata/ato frymëzojnë, motivojnë duke përshkruar maratonat vetjake drejt suksesit; pavarësisht pengesave, duke kaluar nga dështimi në dështim, por pa humbur entuziazmin (siç thotë dhe Churchill). 

Njihuni me Silvana Kulla, sipërmarrësja që ka bërë një revolucion në industrinë e mobilerisë. Kompania e saj, ofruese e pajisjeve teknologjike, ka qenë si bazë zhvillimi për mobileritë në vend. 

Mimoza Vojka është një sipërmarrëse, frymëzim për çdo sipërmarrës që do të sigurojë sukses. Ajo është kombinimi perfekt i një profesionisteje, menaxhereje dhe besnike e standardeve të larta në prodhim dhe trajnimin e punonjësve të kompanisë së saj. Ajo na tregon si e menaxhoi situatën e prodhimit gjatë pandemisë dhe si gjeti mundësi për veten dhe kompani të tjera të prodhimit të veshjeve. 

Ne jemi të lumtur që në qeverinë aktuale kemi një përfaqësi nga komuniteti i sipërmarrjes, startup-eve dhe konsulencës. Ashtu siç jemi të lumtur që intervistën e parë për mediat e shkruara, ministrja e Shtetit për Mbrojtjen e Sipërmarrjes Edona Bilali e dha për ne. 

Mes shembujve të mirë ju kemi sjellë Daniel Nikollën, një djalë ambicioz, por edhe me një shpirt të madh. Ai vrapoi për një kauzë të rëndësishme në Maratonën e Tiranës.

Për të gjithë të interesuarit në zhvillimin personal dhe gjetjen e qetësisë së brendshme, ju sjellim librin e fundit të Sheki Usein “Kthesa e Madhe”. 

Lexo: 3 gjërat me të cilat duhet të jetoni, sipas ambasadorit të lumturisë

Fluturoni bashkë me ne, mes vizionesh të konsideruara të pa-mendueshme më parë, tek flasim për risitë dhe inovacionet që vijnë nëpërmjet investimeve nga milionerët më të mëdhenj të botës për zgjatjen e jetës dhe dominimin e hapësirës.

Ndërkohë, kthehemi sërish me këmbë në tokën tonë të dashur, kur eksplorojmë së bashku histori brandesh shqiptare, të cilat po pozicionohen në mendjet tona dhe në stilin tonë të të jetuarit nëpërmjet bisedës me Arbër Çepani. Ai na tregon se si po zgjeron aktivitetin dhe si po i qëndron besnik fuqizimit të produkteve shqiptare, si rakia.

Nuk mungon kalendari i eventeve, më aktiv se kurrë i mbushur me takime, konferenca, programe përshpejtimi për bizneset dhe zhvillime të reja rrjetëzuese, të nxitura dhe të menaxhuara nga vetë aktorët e komuniteti sipërmarrës. 

Gjëra të bukura po ndodhin dhe shpresojmë që rezultatet të sjellin frytet e duhura!

Për ta mbyllur, 

do t’ju kërkoja që kësaj reviste që po mbani në duar, t’i bëni një foto dhe ta postoni në LinkedIn me hashtag #BM27, duke bërë tag Business Magazine Albania. 

3 Postimet që do të marrin më shumë pëlqime do të marrin dhuratë librin “Standardi i Bitcoin-it”, botimi i parë në shqip mbi këtë sistem të ri monetar që po i ofrohet botës. 

Lexim të këndshëm!

Gerti

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #28 - Prill 2022

Si sipërmarrës e keni dëgjuar, madje e keni predikuar shprehjen: jeta nuk bëhet më e lehtë, thjesht ju bëheni më të fortë. Kësaj radhe po e përjetojmë siç nuk e kishim imagjinuar.

Ndërsa po synonim të dilnim nga kthetrat e pandemisë, një tjetër plagë goditi Europën. Sulmi rus ndaj Ukrainës, i pakonceptueshëm nga bota moderne, erdhi si një Tsunami në Europë dhe madje në të gjithë Botën. Lufta me armë shkatërruese, deri tek kërcënimi i përdorimit të armëve nukleare, po sjell një dëm të jashtëzakonshëm për Ukrainën dhe popullin e saj. Mijëra të vrarë dhe mbi 4 milionë të shpërngulur nga vendi, pavarësisht rezistencës së fortë dhe të paparashikuar të ukrain- asve.

Zhvillimet dinamike në më pak se një muaj, çuan në vendime të pamenduara më parë për dhjetëra kompani ndërkombëtare. Tregjet e lëndëve të para panë çmime të rritura me ritmet më të larta të 40 viteve të fundit, ndërsa sheshet në kryeqytetet botërore, përfshirë Tiranën, pritën protestat, fillimisht kundër luftës e më tej kundër rritjes së çmimeve. Më 8 Mars, Çmimi i Naftës kaloi nga 199 lekë/litër në 260-270 lekë për litër, ndërsa po gjatë marsit, çmimi i bukës masive kaloi nga 80 lekë në 100 dhë së fundi 120 lekë. Qeveria ngriti komitete për të …

Shiko më shumë
Na ndiqni në rrjetet sociale
0