Përpos emocioneve të bukura dhe adrenalinës që sjell kampionati Europian i Futbollit, ai kontribuon pozitivisht edhe në ekonominë e vendit, sipas ekspertëve.
Selami Xhepa, ekspert ekonomie, shpjegon: “Është si një festë e gjatë. Në përgjithësi, e dimë të gjithë që në festat e fundvitit apo evenimente të rëndësishme ka një gjallërim të jetës dhe jetës ekonomike. Kjo do të thotë që qytetarët konsumojnë më shumë, turizmi rritet, ç’ka jep një lloj shtytje dhe krijon një dinamikë pozitive ekonomike. Është si një festë e gjatë, ku jo vetëm ngjarja e Vitit të Ri ka një rol të rëndësishëm, por tani kemi një festë shumë më të gjatë e cila mund të luajë një rol jo aq modest sa episodet e shkurtra në kohë.”
Kur vjen puna për çmimet e produkteve të ndryshme gjatë ngjarjeve të rëndësishme, profesori Selami Xhepa këshillon që bizneset duhet të tregohen të kujdesshme me strategjitë e tyre.
“Raste të tilla shndërrohen në episode për të abuzuar, për të rritur artificialisht çmimet dhe për të krijuar mundësi për fitime eksesive. Kjo nuk është një gjë e mirë dhe si strategji biznesi nuk qëndron sepse njerëzit mund të shpenzojnë më shumë me çmime më të ulëta sesa me çmime më të larta. Fitimet nga rritja e sasisë së shitjes do të ishin më të mëdha sesa kufizimet që krijohen kur rriten çmimet, duke shkaktuar nervozizëm tek blerësit. Kështu që është një strategji jo e këshillueshme biznesi.”
Gjatë gjithë kampionatit Euro 2024, baret dhe restorantet, si dhe “Fan Zonat” e shumta, arketojnë të ardhura të konsiderueshme falë këtij eventi futbollistik. tvklan
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
