Katër javë pas nisjes së procesit të numrit të popullsisë dhe banesave në të Shqipërinë, procesi po vijon normalisht.
Vlerësimi vjen nga Drejtoresha e Institutit të Statistikave (INSTAT), Elsa Dhuli në një intervistë për ATSH-në. Ajo tha se deri tani janë mbledhur rreth 70 % e të dhënave, ndërsa u bëri thirrje të gjithë qytetarëve që t’u përgjigjen anketuesve të INSTAT-it.
Për drejtoren e INSTAT-it, të dhënat e dala nga Censi do të ndihmojnë si qeverinë qendrore dhe atë lokale për mirëmenaxhim të shërbimeve ndaj qytetarëve dhe komunitetit.
“Informacionet që do t’i shërbejnë komunitetit për të prodhuar e pasur informacion mbi statistikat sociale ekonomike, demografike, ndryshimet demografike që kanë ndodhur, cilat janë kushtet e banesës së popullsisë rezidente në territorin e Republikës së Shqipërisë, pra një informacion i një rëndësie vërtet shumë të lartë,“ u shpreh drejtoresha Dhuli.
Lexo:Banka Botërore: Rritja e integrimit ekonomik do t’i ndihmonte vendet e Ballkanit Perëndimor të çlironin potencialin e tyre
Ajo kujtoi se Censi duke ndjekur rekomandimet e OKB-së dhe rregulloret e BE-së ka një set pyetjesh të cilat janë të detyrueshme për tu pyetur dhe përgjigjur nga qytetarët, të cilat shërbejnë për prodhimin e një seti statistikash zyrtare të përcaktuara.
Censi i Popullsisë dhe Banesave ka filluar në datën 18 shtator 2023 dhe do të zgjasë 6 javë.
Sipas ligjit, çdo person, i cili në periudhën që do të kryhet Censi është banor i zakonshëm brenda territorit të Republikës së Shqipërisë, është i detyruar të sigurojë informacionin e kërkuar në pyetësorët e Censit, në një mënyrë të plotë, të saktë dhe të besueshme.
Për herë të parë do të kemi të dhëna të sakta edhe për numrin e të huajve që jetojnë në Shqipëri.
Përjashtimet e vetme janë pyetjet në lidhje me identitetin etnik, fenë dhe gjuhën, për të cilat mund të zgjidhni opsionin “preferoni të mos përgjigjeni”.
Ky është censi i 12-të në historinë e Shqipërisë. Censi i parë është zhvilluar në vitin 1923, 100 vite më parë.
Të dhënat e përfituara nga regjistrimi i vitit 2023 do të publikohen në Qershori 2024.
Sipas ATSH
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
