Barcelona planifikon të rrisë taksën turistike për pasagjerët e kryqëzorëve dhe trageteve që qëndrojnë në qytet për më pak se 12 orë, njoftoi kryebashkiaku Jaume Collboni në një intervistë për gazetën El Pais.
“Ne do të propozojmë një rritje të konsiderueshme të taksës për pasagjerët e kryqëzorëve,” tha Collboni. Kjo masë është pjesë e një sërë masash të shpallura për të ulur ndikimin e turizmit masiv.
Vendimi vjen vetëm disa javë pasi protestuesit në Barcelonë spërkatën me ujë gjatë një demonstrate vizitorët e huaj, duke brohoritur: “Turistë, kthehuni nga keni ardhur.” Qyteti kërkon më pak turistë që të paguajnë më shumë.
Sipas agjencisë Statista, vitin e kaluar Barcelona regjistroi numrin më të madh të pasagjerëve të kryqëzorëve, afërsisht 3.6 milionë. Taksa aktuale turistike për pasagjerët e kryqëzorëve që ndalen në Barcelonë është 7 euro në ditë.
Collboni nuk specifikoi sa do të rritej taksa turistike, por shpjegoi arsyet pas këtij vendimi. “Pasagjerët e kryqëzorëve që qëndrojnë më pak se 12 orë përdorin intensivisht hapësirën publike pa asnjë përfitim për qytetin dhe krijojnë një ndjenjë okupimi dhe mbingarkese,” tha ai. “Ne duam të kemi turizëm që respekton destinacionin.”
Muajin e kaluar, Collboni njoftoi se administrata e qytetit të Barcelonës do të ndalojë dhënien me qira të apartamenteve për turistët duke filluar nga viti 2028. Ai ka vendosur edhe taksa të tjera turistike për të menaxhuar fluksin e vizitorëve.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
