Si ta lësh punën me besim për të ndjekur ëndrrën tënde si sipërmarrës?

Në kohën kur gjithnjë e më shumë profesionistë po kërkojnë të ndërtojnë një të ardhme të pavarur, kalimi nga një punë e sigurt me orar fiks te një biznes personal mund të jetë një nga vendimet më të vështira dhe më të rëndësishme të jetës. Artikulli më poshtë paraqet një udhërrëfyes të qartë dhe praktik për këdo që ndodhet në këtë pikë kthesë.

Lexo gjithashtu: Nga refuzimi në punë te një biznes gjysmë-milionësh, historia frymëzuese e Amber Starling 

Numrat flasin më shumë se emocionet

Përpara se të marrësh çdo vendim, matja e saktë e performancës së pasionit tënd dytësor është thelbësore. Fitimi neto, ritmi i rritjes dhe të ardhurat e përsëritshme janë tregues të fortë të qëndrueshmërisë së një biznesi. Gjashtë muaj të dhëna të detajuara në një spreadsheet jo vetëm që japin qartësi, por ndihmojnë edhe në parashikimin real të të ardhurave kur ky aktivitet bëhet burimi kryesor i të ardhurave.

Një fond emergjence për gjashtë muaj

Pa një mbështetje financiare të qëndrueshme, çdo hap drejt sipërmarrjes mund të kthehet në burim ankthi. Ekspertët rekomandojnë të krijoni një fond që mbulon të paktën gjashtë muaj shpenzime jetese për të përballuar periudhat e ngadalësimit ose investimet e nevojshme për zhvillim.

Testoje jetën si sipërmarrës 

Një javë ose dy në të cilat e trajton pasionin tënd si një punë me kohë të plotë, me orare të rregullta dhe menaxhim të plotë të operacioneve, mund të shërbejnë si një provë e vyer. Kjo përvojë zbulon sfidat reale të përditshmërisë dhe ndihmon në identifikimin e boshllëqeve në sistemin e biznesit tënd.

Redukto rrezikun me kalim të butë

Në vend të një shkëputjeje të menjëhershme, një qasje e ndërmjetme, si kalimi në orar të pjesshëm në punën ekzistuese mund të krijojë një tranzicion të butë dhe më pak të frikshëm drejt sipërmarrjes. Kjo e lejon individin të përqendrohet më shumë në rritjen e biznesit, pa humbur plotësisht sigurinë financiare.

Gjej dikë që e ka bërë këtë më parë

Frymëzimi nga historitë reale të njerëzve që kanë kaluar të njëjtin udhëtim ndihmon në krijimin e një vizioni më të qartë dhe praktik. Këshillat nga ata që e kanë kaluar këtë sfidë mund të jenë të paçmueshme për të shmangur gabimet e zakonshme dhe për të forcuar vendosmërinë.

Lexo gjithashtu: 5 llojet e konsumatorëve që mund të shkatërrojnë biznesin tënd

Vendos kriteret për suksesin

Largimi nga puna nuk duhet të ndodhë “kur të ndihesh gati”, por kur të kesh arritur objektiva konkrete. Për shembull, kur të ardhurat nga biznesi dytësor arrijnë 75% të rrogës aktuale për tre muaj rresht, ose kur një produkt apo shërbim shet në mënyrë të qëndrueshme pa kërkuar praninë e vazhdueshme të themeluesit.

Investo në mjete që ndihmojnë në rritje

Shumë sipërmarrës presin deri në momentin që ngarkesa i tejkalon kapacitetet e tyre, për të investuar në sisteme profesionale. Përdorimi i mjeteve për menaxhimin e klientëve, shitjeve dhe inventarit që në fazat e hershme jo vetëm që lehtëson punën, por tregon edhe seriozitetin me të cilin po ndërtohet biznesi.

Planifiko skenarin më të keq

Çfarë ndodh nëse gjërat nuk ecin sipas planit? Planifikimi i një “plani B” ofron një ndjesi qetësie. Kthimi në profesionin e mëparshëm, përdorimi i aftësive të tregtueshme ose reduktimi i përkohshëm i shpenzimeve janë opsione që, nëse janë të qarta paraprakisht, zbusin frikën nga e panjohura.

Braktisja e një pune të qëndrueshme për të ndjekur ëndrrën e një biznesi nuk është një hap i thjeshtë, por me përgatitje të duhur, matje të kujdesshme dhe vendimmarrje të informuar, ai mund të kthehet në një kapitull të ri, të suksesshëm dhe të qëndrueshëm në jetën e kujtdo që ka guximin të ecë përpara. Sipërmarrja nuk është vetëm një hedhje në zbrazëti, është ndërtimi i një ure dhe kalimi me vetëdije në anën tjetër.

Entrepreneur