Këtë të shtunë, më 6 korrik, është publikuar kalendari i procedurave për aplikimin në universitete për vitin akademik 2024-2025. Ministrja e Arsimit, Ogerta Manastirliu, bëri të ditur se procesi i aplikimit dhe regjistrimit do të realizohet online në portalin universitar “U-Albania”.
Faza e parë: Pagesa e tarifave
Faza e parë e këtij procesi është pagesa e tarifave, e cila nis më 15 korrik dhe përfundon më 29 korrik. Kandidatët duhet të kryejnë pagesën e tarifës së aplikimit, që është 2000 lekë. Kjo pagesë mund të bëhet në zyrat e Postës Shqiptare apo në bankat e nivelit të dytë, përmes faturës për arkëtim që shkarkohet nga portali U-Albania. Pas dorëzimit të mandatit të pagesës, sekretaritë e shkollave duhet të konfirmojnë pagesën e kryer brenda datës 29 korrik 2024, në portalin U-Albania.
Faza e dytë: Aplikimi online
Aplikimi online do të realizohet në periudhën 30 korrik – 4 gusht. Gjatë këtyre gjashtë ditëve, maturantët kanë mundësinë të zgjedhin deri në 10 programe studimi. Më 28 gusht është parashikuar faza e ankimimit, ku kandidatët mund të paraqesin ankesat e tyre nëse ka ndonjë problem me aplikimin ose renditjen.
Faza e tretë: Regjistrimi në Institucionet e Arsimit të Lartë
Faza e regjistrimit në Institucionet e Arsimit të Lartë do të zhvillohet nga data 30 gusht deri më 13 shtator. Gjatë kësaj periudhe do të bëhet publikimi i renditjes së kandidatëve. Për ata që dëshirojnë të çregjistrohen, është caktuar një kohëzgjatje prej dy ditësh, nga 14 deri më 15 shtator.
Ky kalendar ofron një udhëzues të qartë për të gjithë kandidatët që synojnë të ndjekin studimet e larta në vitin akademik 2024-2025, duke siguruar që secili hap i procesit të kryhet me transparencë dhe në kohën e duhur.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English