Fëmijët që mësojnë vetëm të japin përgjigjen e saktë mund të jenë më të rrezikuarit në të ardhmen. Sipas neuroshkencëtares Vivienne Ming, mënyra tradicionale e edukimit po i përgatit ata për role që inteligjenca artificiale mund t’i zëvendësojë shumë shpejt.
Lexo gjithashtu: Mailchimp/ Nga një agjenci e vogël… në një biznes prej 21 miliardë dollarësh!
Ajo thekson se suksesi nuk do të varet më nga sa shumë dimë, por nga mënyra si mendojmë. Kreativiteti, kureshtja dhe aftësia për të zgjidhur probleme janë aftësitë që do të bëjnë diferencën dhe këto nuk mësohen përmes memorizimit.
Një nga qasjet që ajo sugjeron është ndryshimi i mënyrës si shohim dështimin. Në vend që të shmanget, ai duhet të dokumentohet dhe të diskutohet hapur. Ideja e një “CV-je të dështimeve” synon t’i mësojë fëmijët të eksperimentojnë, të gabojnë dhe të mësojnë nga përvoja, duke ndërtuar reziliencë dhe vetëbesim.
Po aq i rëndësishëm është edhe mjedisi ku rriten. Në vend të një strukture të ngurtë dhe të parashikueshme, Ming sugjeron një ambient që nxit eksplorimin dhe zbulimin. Një hapësirë ku pyetjet janë po aq të rëndësishme sa përgjigjet dhe ku fëmijët përballen me sfida reale që nuk kanë gjithmonë një zgjidhje të qartë.
Ndërkohë, përdorimi i inteligjencës artificiale duhet të trajtohet me kujdes. Fëmijët nuk duhet të mësohen ta përdorin atë si burim përgjigjesh të gatshme, por si një mjet për të sfiduar mendimin e tyre. Duke analizuar dhe vlerësuar përgjigjet e AI, ata zhvillojnë aftësinë për të menduar në mënyrë kritike dhe të pavarur.
Mesazhi është i drejtpërdrejtë, në një realitet ku përgjigjet janë gjithmonë në dispozicion, vlera më e madhe që një individ mund të sjellë është mënyra unike se si mendon dhe krijon.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
