Punët janë edhe shkallët e karrierës që ne ngjitim vazhdimisht, edhe destinacionet përfundimtare të karrierës sonë. Nëse jeni refuzuar për një punë, kjo gjë mund t’ju bëjë të ndiheni të dëshpëruar. Për më tepër, bëhet akoma më e vështirë nëse të gjitha shpresat i keni lidhur me një punë specifike. Ndoshta mendonit se do ta fitonit me patjetër atë vend pune, gjë që e bën akoma më zhgënjyes momentin kur merrni njoftimin se nuk jeni pranuar. Në kushtet aktuale ekonomike, refuzimi për një vend të caktuar pune mund të duket si fundi i rrugëtimit tuaj. Megjithatë, duke kuptuar arsyet pse u refuzuat dhe çfarë mund të mësoni nga situata, ju mund të riktheheni përsëri me energjitë dhe shpresat tuaja, edhe kur refuzoheni për një pozicion pune.
Arsyet pse mund të refuzoheni për një punë të caktuar
Mund të ketë një sërë arsyesh të cilat mund të sjellin refuzimin tuaj për një pozicion pune. Disa njerëz nuk arrijnë dot as te faza e intervistës, ndërsa të tjerë kualifikohen deri në këtë fazë, por nuk pranohen për pozicionin e punës. Sido që të jetë rasti, disa arsye të zakonshme që mund të sjellin refuzimin tuaj për një vend pune janë:
Dikush tjetër ka më shumë përvojë se ju
Do të ketë raste kur një punë është përtej nivelit tuaj të përvojës. Ndoshta keni menduar se kishit mjaftueshëm vite përvojë në industri dhe ekspertizën e duhur për t’u kualifikuar për atë pozicion pune. Megjithatë, dikush tjetër mund të ketë pasur më shumë përvojë se ju, dhe kjo mund të ketë qenë pikërisht gjëja që po kërkohej nga menaxheri i punësimit. Nuk duhet ta lejoni këtë lloj refuzimi që t’ju bëjë të ndiheni të dëshpëruar. Duhet kohë për të arritur nivelin e duhur të përvojës.
Aftësi jo të përshtatshme për vendin e punës
Përveç mundësisë se dikush tjetër ka pasur më shumë përvojë se ju, një tjetër arsye mund të jetë fakti që ju mungojnë aftësitë e nevojshme për pozicionin. Nëse kjo është arsyeja, atëherë ju mund të keni keqkuptuar kërkesat e vendit të punës, të shprehura në njoftimin që keni parë. Në disa raste, personi që përgatit njoftimin e punës mund të mos i ketë listuar të gjitha aftësitë e nevojshme. Kështu, do të ishte e vështirë që ta dinit se nuk i zotëronit aftësitë e kërkuara, deri në momentin kur merrni refuzimin për punën.
Pozicioni nuk është më i nevojshëm
Ndonjëherë, një pozicion pune hapet, pastaj nuk është më i nevojshëm. Ndoshta menaxheri ka bashkuar dy pozicione në një të vetëm dhe, për rrjedhojë, nuk ka më nevojë për njërin prej tyre. Ose ndoshta mund të kenë kuptuar se nuk ishte nevoja që të plotësohej pozicioni vakant për arsye të tjera. Është zhgënjyese të bësh të gjitha procedurat për të aplikuar për një punë, vetëm për të kuptuar se ajo nuk është më e nevojshme.
Përshkrimi i punës ka ndryshuar
Ju mund të mos i përshtateni pozicionit nëse menaxheri i punësimit ndryshon përshkrimin e punës. Kompania mund të ketë bërë ndryshime pasi ka publikuar njoftimin e punës. Në momentin që kjo ndodh, mund të mos jetë e përshtatshme ose e mundur që të ndryshohet përsëri njoftimi. Në varësi të ndryshimeve që i kanë ndodhur përshkrimit, ju mund të jeni ende i kualifikuar për një vend pune, ose jo. Në rastin e fundit, do t’ju duhet të vazhdoni për të gjetur një punë tjetër që përshtatet me ju.
Mospërputhja e kulturës
Jo gjithmonë refuzimi për një punë të caktuar varet nga performanca juaj gjatë intervistës ose nga aftësitë tuaja. Mund të ndodhë që të mos jeni të përshtatshëm për kulturën e kompanisë, pasi, në fund të fundit, çdo kompani ka qasjen dhe mënyrën e vet të të bërit të gjërave. Vlerat dhe misioni i saj mund të mos përputhen mirë me qëllimet tuaja. Kjo nuk është diçka e keqe për ju në vetvete; thjesht nuk përshtateni mirë në atë ambient. / The Ladders
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
