Banka Botërore ka të njëjtin qëndrim me atë të FMN-së, e cila ka pohuar më herët se përfshirja e këtyre bizneseve në skemë do të krijojë më shumë ngarkesë për administratën dhe do ta shpërqendrojë, në vend të fokusohet tek ndërmarrjet e mëdha dhe kjo mund të ndikojë në uljen e të ardhurave.
Hilda Shijaku, eksperte e Bankës, gjatë prezantimit të raportit të rregullt ekonomik për Ballkanin Perëndimor tha se barra administrative për të mbledhur TVSH-në te biznesi i vogël është e ulët, duke theksuar se edhe përfitimi që mund të vijë nga kjo nismë është i ulët.
Jens Reinke, përfaqësuesi i FMN-së në Shqipëri, është shprehur se “pas vlerësimeve të shumta nga ekspertët tanë të taksave, ne e kemi këshilluar qeverinë fuqimisht kundër uljes së kufirit të TVSH-së nga niveli aktual. Ndërmarrjet e vogla përbëjnë gjysmën e të gjithë bizneseve, por sjellin vetëm 2% të transaksioneve të taksueshme. Zgjerimi i sistemit të TVSH-së do të jetë një barrë shumë e rëndë për burimet e Departamentit të Taksave. Informaliteti dhe evazioni i taksave mund të rritet dhe eficenca e administratës së taksave ka të ngjarë të bjerë. Sipërmarrjet e vogla do të mund të përballen gjithashtu me një barrë të shtuar të kërkesave për raportime.”
Pavarësisht këtyre qeveria vazhdoi me planin e saj dhe TVSH për biznesin e vogël filloi të zbatohej më 1 Prill, duke ngjallur pakënaqësi të shumta te sipërmarrjet e vogla, të cilat kanë mbyllur qepenat disa herë në formë proteste.
Lexoni: Ahmetaj: Nuk tërhiqemi nga TVSH e Biznesit të Vogël
Nga ana tjetër ministri i Financave Arben Ahmetaj, ka këmbëngulur se skema e TVSH që përfshin bizneset e vogla, është një hap i rëndësishëm për të luftuar informalitetin. Sipas ministrit, kjo reformë ka në fokus saktësimin e deklarimeve të biznesit të madh dhe jo gjenerim të ardhurash nga biznesi i vogël.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
