Suksesi është më i sigurt kur afër ke një mentor


Ka njerëz, të cilët kanë më shumë eksperiencë, më shumë njohuri, të cilat ti ndoshta nuk i ke. Të bësh gjëra të mëdha është e vështirë. T’i bësh ato vetë, shpesh është e pamundur. Ja përse të gjithë drejtuesit e mëdhenj kanë mentorë dhe mentorojnë njerëz të tjerë. Nuk ka rëndësi sa ambicioz jeni, sidomos në hapat e parë të karrierës. Suksesi është një sport skuadre.

Steve Jobs kishte Bill Campbell si mentor; Mark Zuckerberg kishte Steve Jobs; Bill Gates kishte Warren Buffett. Që nga lashtësia mentori ka qenë një figurë e pranishme. Në veprën e Homerit, ai shfaqet për të ndihmuar Odisenë, duke u kujdesur për djalin e tij përpara se të nisej në Luftën e Trojës.

Sa më lart që ngjitesh në pozicione aq më i vetmuar fillon të ndjehesh dhe sa më shumë që fillon e jeton dhe mendon si një sipërmarrës aq më i shkëputur nga të tjerët bëhesh. “Për të patur një mentor duhet të duash të punosh për të ndërtuar veten, por përgatitu sepse ky ndryshim kërkon sakrificë dhe mos prit që njerëzit të të kuptojnë ose duartrokasin”, thotë Gerion Treska, Entrepreneurship Community Facilitator, Sipërmarrës.

Gjithçka nis me një marrëdhënie, mirëbesim, përkushtim e përgjegjshmëri gjatë gjithë kësaj marrëdhënieje.

Roli i mentorit lidhet me zhvillimin dhe qëndrueshmërinë gjatë gjithë jetës. Mentori nuk është si një aparat pijesh freskuese apo çokollatash që sa herë nevojitet një këshillë nga eksperienca apo njohuria e tij, ti fut monedhën dhe të del ajo që kërkon.

A mund ta konsiderojmë një profesion? “Nuk është një profesion, është diçka që ti dhuron dhe qëndron e lidhur fort si karakteristikë me karakterin tënd si person”, thotë z.Treska.

Karakteristika kryesore e një mentori është “dhënia”. Nëse dëshiron të dëgjosh të tjerët, të jesh empatik por edhe kritik, inkurajues, kërkues si dhe i përkushtuar, këto janë përbërësit e parë të mirë për të nisur si një mentor.

Por, ka dhe nga ato raste që nuk e shohin të rëndësishëm rolin e një mentori në jetën e tyre. Gary Vaynerchuk, një shembull suksesi, udhëzon: “Luaj këmbët, tundu, bëj gjërat të ndodhin, NUK të duhet një mentor”. Dhe mbase si Gary, ka plot raste njerëzish të suksesshëm që mund t’ia dalin edhe pa mentorë.

Pa shkuar shumë larg, mentorët mund t’i gjejmë në përditshmërinë tonë, në rrethin tonë të ngushtë. A mund të paguhet një mik që të dëgjon, sakrifikon për të qenë me ty dhe është i interesuar për zhvillimin tënd?! … Nuk presim një përgjigje për këtë.

Lexoni: 7 Mentorë që tashmë i keni, por nuk i dalloni!

“Në Shqipëri kemi njerëz të gatshëm të jenë mentorë, sidomos vitet e fundit. Madje nëse mbani mend historitë që nisin ‘ka qenë një plak që na këshillonte…’, po flasim për një MENTOR,” thotë për businessmag z. Treska, “Ajo çfarë duket më pak në shoqërinë tonë është nevoja, dëshira dhe kërkesa për të qenë i mentoruar”.

Treska, me përvojë në fushën e mentorimit, na tregon se mentori NUK DUHET të marrë vendime për ty. Ai/ajo është aty të të shoqërojë në procesin e vendimmarrjes përmes të dëgjuarit, pyetjeve, mbështetjes emocionale, eksperiencës dhe njohurive të veta. Është në dorën e të mentoruarit nëse vendos ose jo t’i ndjekë këshillat. 

Ndërtimi dhe mirëmbajtja e një marrëdhënieje është diçka që kërkon kohë, energji dhe sakrificë, ndaj nëse nuk jeni gati për këto mund të jetë një fillim i mirë për t’u ndërtuar mbi këto elementë.

Must watch
Business Mag Nr. #23 - Qershor 2020

Të gjitha planet tuaja për këtë vit, si individë apo sipërmarrës mund të jenë përmbysur. Mbërritja e Coronavirusit në Shqipëri paralizoi gjithçka, ashtu si kudo. Në mënyrë të papritur na vuri në kushte tërësisht të tjera pune, na shtoi pasigurinë e shqetësimin për të ardhmen.

Sipërmarrjet, kryesisht në fushën e IT u përshtatën më shpejt, duke angazhuar punonjësit nga shtëpia. Ato zhvilluan dhe më tej mundësitë për të punuar në distancë, ndërkohë që shumë kompani të tjera u mbyllën plotësisht.

Kjo është një periudhë sprove, për individin, drejtuesit dhe liderin. Kjo është lufta që po zhvillohet në spitale dhe fronti i parë i saj janë mjekë, infermierë e sanitarë. Historia e ekonomisë k a treguar se gjithmonë pas një situatë të vështirë ka një ringritje. Dhe ne besojmë se kështu do të jetë.

Deri atëhërë ajo çka na mbetet të bëjmë është respektimi i rregullave të kërkuara, marrja e përgjegjësive ndaj të tretëve për aq sa mundemi, e të interesohemi për të pamundurit, të ndajmë diçka për ta.

Solidariteti nuk ka munguar e nuk do të na mungojë as kësaj radhe. Ajo çfarë doli në pah krahas solidaritetit ishte varfëria: e shtetit, e kompanive dhe e vetë individëve.

Një ditë pas dërgimit të 30 bluzave të bardha në Itali, The Guardian na vlerësoi në artikullin e saj si zemërgjerë edhe pse Ky numër ishte planifikuar të botohej në Prill 2020, por procesi u shty për shkak të masave të ndërmarra si pasojë e shpërthimit të Covid-19. Edhe pse në kohë vështirësish, jemi …

Shiko më shumë
Na ndiqni në rrjetet sociale