Startup Live Tirana është një event 3-ditor në të cilin të rinjtë konkurojnë me ide të ndryshme inovative të aplikueshme në fusha të ndryshme të biznesit. Business Magazine pati kënaqësinë të ishte pjesë e Startup Live Tirana si media partner e këtij eventi. Pjesëmarrësit e këtij viti ishin më së shumti studentë me profile të ndryshme por edhe sipërmarrës të rinj në hapat e parë të biznesit të tyre.
Edhe këtë vit, eventi u moderua nga Georg Kuttner, partner ndërkombëtar i Startup Live. Dita e parë ngjiti në skenë rreth 30 ide biznesi të cilat prezantuan në një hark kohor prej 90 sekondash secili. Më pas pjesëmarrësit u ndanë në grupe, për të bashkëpunuar në realizimin e një projekti që do t’u sillte atyre fitoren.
Gjatë ditës së dytë, pjesëmarrësit u trajnuan për zhvillimin e konceptit të biznesit të tyre, ndërtimin e një modeli biznesi, si ta marketonin atë apo si ta prezantonin para investitorëve. Dy folësit kryesorë ishin pikërisht moderatori i këtij eventi, Georg Kuttner i cili foli rreth asaj çfarë duhet për t’u bërë një sipërmarrës, ndërsa folësi tjetër ishte Shkëlzen Marku, CEO i Yunus Social Business, i cili bëri një prezantim mjaft interesant rreth startupeve të reja, nga mund të lindin idetë për krijimin e tyre, çfarë problematikash duhet të zgjidhin startupet etj. Gjatë kohës së mentorimit, e cila zgjati rreth 3 orë, grupet morën feedback nga mentorët dhe profesionistët për të përmirësuar dhe rritur idenë e tyre të biznesit.
Dita e tretë dhe e fundit ishte sigurisht më emocionuesja për të gjithë grupet pjesëmarrëse sepse do të shpalleshin edhe fituesit e çmimeve, të mundësuara nga sponsorët. Pas prezantimeve finale të të gjitha grupeve ishte momenti i një pushimi të shkurtër, ku juria do të vendoste edhe fituesit.
Çmimin special e fitoi grupi “Uisli” ndërsa çmimin “Community Winner” e mori grupi “Iqueue“. Fituesit e vendit të tretë ishin grupi “Buna-Drita”, të cilët përfituan “Full branding&Trademark” nga Urbanus, 3 muaj në programin e akselerimit në Yunus Social Business, 6 muaj në programin e akseleratorit AIA (Albanian Innovation Accelerator) dhe “Voucher Marketing” nga njoftime.com.
Çmimin e dytë e fitoi grupi “MedNet”, të cilët përfituan 3 muaj në programin e akselerimit në Yunus Social Business, 6 muaj në programin e akseleratorit AIA (Albanian Innovation Accelerator), 1 muaj falas për të punuar në ambjentet e Tirana Business Park, “Voucher Marketing” nga njoftime.com dhe 6 muaj mentorim në web design dhe programim nga t&soft.
Grupi fitues i çmimit të madh ishte “Nimbus”, të cilët përfituan 6 muaj në programin e akseleratorit AIA (Albanian Innovation Accelerator), 1 muaj falas për të punuar në ambjentet e Tirana Business Park, “Voucher Marketing” nga njoftime.com, 6 muaj mentorim në web design dhe programim nga t&soft dhe çmimin e madh prej 5 milionë lekësh.
Startup Live Tirana është shansi i të gjithëve për t’u bërë pjesë e skenës së startup-eve! Duke paraqitur idenë tuaj, frymëzohuni, krijoni apo bashkohuni me një ekip, merrni reagime nga mentorët ndërkombëtarë, pitch para sipërmarrësve më të mirë në qytet dhe punoni së bashku në bizneset e së nesërmes!
Vizioni i Startup Live është të krijojë një komunitet global të mendjeve sipërmarrëse dhe influencuesve të startupeve për të mbështetur njëri-tjetrin dhe për t’u rritur së bashku. Nuk ka rëndësi nëse jeni anëtarë ekipi të profilit të lartë, investitorë potencial, mentor me përvojë apo media përfaqësuese: Startup Live do të sigurohet gjithmonë që ju do të takoni njerëzit e duhur.
