Pas tre muaj radhazi në rënie, besimi në ekonomi u rrit përgjatë nëntorit.
Sipas vrojtimit të Bankës së Shqipërisë treguesi i ndjesisë ekonomike muajin e kaluar u rrit me 0.9%, ndikuar veçanërisht nga përmirësimi i besimit në sektorin e ndërtimit por dhe prej atij të konsumatorëve, edhe pse me rritje të lehtë.
Më optimizëm kanë shfaqur bizneset e sektorit të ndërtimit ku treguesi i besimit u rrit me 6.3%, vlera më e lartë e pesë viteve të fundit, duke reflektuar ecuri pozitive si për porositë aktuale ashtu edhe për përmirësimin e aktivitetit ndërtues në muajt e fundit. Ndër të tjera, presin rritje të mëtejshme të çmimeve të apartamenteve në të ardhmen.
Më pesimiste situata duket për sipërmarrjet që operojnë në sektorin e industrisë e tregtisë, pasi besimi i tyre në ekonomi shënoi rënie muajin e kaluar, ndikuar kryesisht prej vlerësimeve të ulëta për ecurinë aktuale të biznesit si dhe pritshmërive për të ardhmen.
Sa i takon çmimeve të shitjes në muajt në vijim ato presin një rritje të tyre.
Ndërsa treguesi i besimit në shërbime ka mbetur thuajse i pandryshuar, ku bizneset vlerësuan më pak pozitivisht ecurinë e tyre, ndërsa presin një situatë më të përmirësuar në vijim lidhur me kërkesën për shërbime por edhe një ecuri më të mirë të punësimit në këtë sektor.
Pritshmëritë pozitive për gjendjen e përgjithshme ekonomike në vend por edhe për situatën e tyre financiare kanë bërë që besimi i qytetarëve të përmirësohet gjatë nëntorit.
Megjithatë, vlerësimi i tyre për të bërë blerje në shuma të mëdha si ajo për një banesë apo pritjet për blerje në të ardhmen paraqitet në rënie, duke reflektuar edhe rritjen e çmimeve të mallrave e shërbimeve veçanërisht muajt e fundit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
