Në fillim të të 20-tave, Gëzim Prenga punonte si kamerier në ishullin e njohur grek, Mykonos. Atëherë filloi të pyeste veten pse fshati i tij në veri të Shqipërisë nuk mund të tërhiqte turistë nga e gjithë bota. Pas mbi 13 vjetësh, ai realizoi ëndrrën e tij në Fishtë të Lezhës.
Çdo natë, pas një dite të lodhshme pune në emigracion, Gëzimi ëndërronte për kthimin në vendlindje. “Mykonos kishte qenë një tokë e thatë me shtëpi të vjetra, por duke i restauruar dhe ruajtur origjinalitetin, ishte shndërruar në një ishull të famshëm. Mendova, pse jo edhe Fishta?”, kujton ai.
Pas katër vjetësh në Greqi, Gëzimi vendosi të kthehej në Fishtë dhe të punësohej në kantinën e verës së një biznesi lokal. Me kohë, mendoi të krijonte agroturizmin e tij, por shpesh e pengonte frika e dështimit. Para pesë muajsh, ai bëri realitet ëndrrën e tij, duke rikonstruktuar shtëpinë e gjyshit në një bujtinë.
Shtëpia e gjyshit ishte thuajse e degraduar, por Gëzimi dhe familja e tij e rikonstrukuan duke ruajtur origjinalitetin. “Dritaret e vogla, dyert e ulëta, oxhaku me dru, mulliri ku bluhej kafeja, dhe ora e vjetër – të gjitha janë ruajtur ashtu siç kanë qenë”, thotë ai.
Bujtina “Vitoria”, që mban emrin e motrës së ndjerë të Gëzimit, tani mirëpret turistë nga vende të ndryshme të botës, përfshirë Gjermaninë, Suedinë, Norvegjinë, Ukrainën, Italinë, Greqinë, SHBA-në dhe madje edhe Irakun. Në vetëm pesë muaj, të gjitha datat deri në fund të tetorit janë të rezervuara.
“Të ardhurat që përfitoj dhe kënaqësia e turistëve na bëjnë të ndihemi shumë mirë”, thotë Gëzimi. Bujtina gjithashtu ofron ushqime bio nga ferma e familjes së tij dhe mundësi për të vizituar shtëpinë-muze të At Gjergj Fishtës dhe qendra të vogla artizanati në Fishtë. Strategjia e re për agroturizmin e qeverisë shqiptare synon të rrisë ndikimin e këtij sektori në ekonominë e vendit deri në vitin 2027.evropaelire
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
