Nga data 21-29 qershor në Tiranë do të mbahet Java Kulturore Braziliane. Ky event do të sjellë një përzierje të pasur të artit, muzikës dhe kinemasë braziliane për publikun shqiptar.
Ajo do të çelet me Natën Poetike Braziliane, një përvojë e rrallë që ndërthur bukurinë e poezisë me tingujt e përkryer të pianos. Publiku do të ketë rastin të përjetojë frymën e letërsisë braziliane përmes interpretimeve të veprave të njohura. Interpretimi do të jetë në dy gjuhë, shqip dhe portugalisht, dhe do të marrë jetë nga publikues, përkthyes dhe pjesëtarë të komunitetit brazilian. Do të lexohen vepra nga autorë të njohur brazilianë si Hilda Hilst, Fernando Pessoa, novela “The Psychiatrist” nga Machado de Assis dhe vepra nga Miguel Torga.
Më 24 qershor do të mbahet koncerti i harqeve “Camerata Balcanica”. Camerata Balcanica bashkon artistë të rinj të muzikës klasike nga Ballkani Perëndimor. Një grup prej 10 muzikantësh, të përbërë nga katër violina, dy viola, dy cello dhe një bas, do të performojnë disa pjesë muzikore të zgjedhura braziliane. Ky grup përbëhet nga artistë të rinj dhe të talentuar të muzikës klasike nga Ballkani Perëndimor, të cilët do të sjellin në skenë një përvojë të jashtëzakonshme muzikore.
Më 25 qershor, në kinema “Millenium” do të shfaqet filmi brazilian “Behind the Sun”. Filmi i vitit 2001 realizuar me regji të Walter Salles dhe frymëzuar nga “Prilli i Heshtur” i autorit shqiptar Ismail Kadare, është një dramë e fuqishme që eksploron konfliktet familjare dhe hakmarrjen në një fshat të izoluar në Brazilin verior. Filmi është vlerësuar për narrativën e tij të thellë dhe vizualet e mrekullueshme, duke ofruar një pasqyrë të pasur të kulturës dhe historisë braziliane.
Këto aktivitete janë vetëm disa nga ngjarjet që do të mbahen gjatë Javës Kulturore Braziliane në Tiranë, duke ofruar një mundësi të veçantë për publikun shqiptar të njohë dhe të vlerësojë artin dhe kulturën e pasur të Brazilit.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
