KreoSpace, një projekt ideje, Marina Lusha na tregon rrugën që po ndjek për t’u ngritur

Marina Lusha, themeluesja e KreoSpace, e cila u prezantua në Women Startup Competition, shpreh vlerësime për hapsirën e krijuar në këtë kompeticion si dhe në konkurset e tjera që ka marrë pjesë. Ajo na tregon për iniciativën inovative që synon të ndryshojë mënyrën si përdoruesit përjetojnë hapësirat e tyre të punës. Marina do të na tregojë më shumë rreth motivacionit dhe inspirimit për të filluar këtë projekt, si dhe sfidat dhe hapat e arritjeve në rrugën drejt krijimit të një mjedisi të ri dhe të përshtatshëm për kohën tonë.

Kur vendosët të themeloni startup-in tuaj, çfarë ju motivon në këtë sipërmarrje?

Ideja ka ardhur që në vitin e parë kur unë fillova të punoja në një zyrë tipike. Ndieja dëshirën për të mos qenë e kufizuar me mure dhe orare. Pas pandemisë u përforcua më tepër si ide. Me shtimin e alternativave të punësimit në distancë, dhe “vendet e treta”, siç i quan sociologu Ray Oldenburg, pra hapësirat që krijojnë komunitete, përtej shtëpisë apo zyrës. Kjo më motivoi të krijoja një hapësirë alternative pune, ku kombinohet një mjedis profesional me natyrën dhe që nxit krijimin e një komuniteti.

Cili është misioni dhe vizioni juaj?

 Pavarësisht se KreoSpace është akoma një projekt ide, misioni kryesor është krijimi i mjediseve inovative pune, që nxisin produktivitetin dhe kreativitetin. Vizioni ynë është krijimi i disa vendndodhjeve të këtyre hapësirave si njësi ekologjike duke promovuar ekuilibrin e punës dhe jetës. 

Cilat janë sfidat kryesore që keni hasur në fillimet tuaja dhe si po i përballoni?

Sfida kryesore është fillimisht gjetja e vendndodhjes së duhur, që të jetë dhe lehtësisht e asksesueshme nga njerëzit, por edhe pranë hapësirave të gjelbërta.

Cila është faza e startup-it tuaj, çfarë po bëni aktualisht? Cilat kanë qenë hapat kyçe në këtë rrugëtim?

Ky startup është në fazat e para të krijimit. Ndër hapat e parë të rrugëtimit janë zgjerimi i skuadrës, sigurimi i vendndodhjes se parë dhe ndërtimi i një komuniteti.

Cilat janë vlerat dhe besimet që ju udhëheqin në sipërmarrje?

Ne vlerësojmë inovacionin dhe krijimin e komunitetit, mbështesim qasjet ekologjike dhe besojmë që krijimi i hapësirave të tilla mund të kenë një ndikim pozitiv në një qytet të madh si Tirana, apo dhe vendeve të tjera.

Çfarë zgjidhje ofroni në treg për klientët tuaj?

KreoSpace ofron ambjente alternative pune, ambjente për takime, apo workshope të vendosura në njësi me gjurmë minimale në tokë, pranë hapësirave të gjelbërta. Këto njësi kanë çdo komoditet të nevojshëm si në një zyrë tipike, mobilimin e përshtatshëm, internetin e shpejtë dhe ndriçimin natyral patjetër. 

Si po ndikon ndryshimi i teknologjisë dhe i tregut në sipërmarrjen tuaj?

Teknologjia ndikon pozitivisht në këtë startup, pasi ka mundësuar lehtësisht opsionin e punës në distancë. 

Gjithashtu ndryshimet në treg, si rritja e kërkesës për mjedise pune fleksibël, dëshira për të punuar gjithnjë e me tepër si nomad digjital, ndikojnë pozitivisht duke rritur interesin për të qenë pjesë e këtyre hapësirave.

Cilat janë planet tuaja për rritje të ardhshme dhe strategjitë për t’i arritur ato?

Planet tona për rritjen në të ardhmen përfshijnë zgjerimin e vendndodhjeve, zhvillimin e programeve të abonimit, ndërtimin e partneriteteve strategjike si dhe ndërtimin e strukturave të gatshme për kompani të përmasave të mëdha. 

Çfarë ju bën më të lumtur në sipërmarrjen që keni nisur?

Ajo që më bën të lumtur është fillimisht mbështetja që ka patur si projekt ide nga Women Startup Competition 2024 dhe disa konkurse të tjera ku kam marrë pjesë dhe mendimi se hapësira të tilla vërtetë mund të kenë një impakt pozitiv në jetën e punonjësve. 

Çfarë synoni të realizoni në 3 vitet e ardhshme?

Në 3 vitet e ardhshme synojmë të vëmë në zbatim krijimin e këtyre njësive në vendndodhje të ndryshme si dhe zhvillimin e një programi abonimi fleksibël. Synojmë të zbatojmë gjithmonë praktika ekologjike dhe të nxisim angazhimin komunitar.