Edlira Dyrmishaj është një profesioniste e kompletuar me përvojë të gjerë në psikologjinë klinike, ndërmjetësimin ligjor dhe avokimin për të drejtat dhe fuqizimin e grave. Qytetare e angazhuar për ndryshim pozitiv, Edlira është psikoterapiste e çertifikuar dhe autore e disa artikujve shkencorë mbi të drejtat e grave dialogun ndërfetar dhe shëndetin mendor. Angazhimin qytetar ajo e sheh si një detyrë të çdo të rrituri për të kontriubuar në një të nesërme më të mirë, ndaj edhe së fundmi i është bashkuar politikës sepse beson se ndryshimi nuk është rastësor, por vjen duke vepruar.
Për të, të jesh grua në karrierë përfaqëson balancën mes ambicies dhe përgjegjësive, duke dëshmuar që suksesi nuk ka kufij gjinorë dhe as fetar. Nga një përjashtimi nga shkolla për shkak të shamisë, në një udhëtim shpirtëror e akademik në Mekë, në themelimin e një qendre sociale, profesionin si psikologe dhe sot aspirante per një vend në Kuvendin e Shqipërisë rrugëtimi i saj është mishërimi i një gruaje që zgjodhi të mos dorëzohej.
Le të kthehemi në fillim: Si e përjetove momentin kur u përjashtove nga gjimnazi në moshën 16-vjeçare, dhe çfarë ndikimi pati kjo ngjarje në formimin tënd personal dhe profesional?
Ajo ishte një pikë kthese për mua. Një moment ku dhimbja dhe pasiguria u transformuan në forcë dhe vendosmëri. U ndjeva e papërkrahur nga sistemi, por kjo më mësoi të besoj te vetja dhe te vlerat që përfaqësoj. Aty kuptova se sfidat nuk të përcaktojnë, por mënyra se si i përballon ato tregon kush je. Ky episod më ndihmoi të zhvillohem profesionalisht dhe më mësoi që çdo pengesë mund të jetë një trampolinë drejt diçkaje më të madhe.
Cila ishte arsyeja që zgjodhe të studioje në Universitetin Umm Al-Qura në Mekë, dhe si ndikoi kjo eksperiencë ndërkombëtare në formimin tënd si studiuese, por edhe si grua myslimane?
Meka ishte jo vetëm një zgjedhje akademike, por edhe një udhëtim shpirtëror. Vendosa të studioj në Umm Al-Qura sepse doja të ndërthurja shkencën me besimin, dije me shpirtin. Ky përjetim më dha një horizont të ri mbi botën, më fuqizoi si grua dhe më bëri të kuptoj se feja nuk është një kufizim, por një burim frymëzimi për të kontribuar në shoqëri me krenari dhe paqe.
Ke themeluar një qendër sociale në Fier që ndihmon komunitetin dhe veçanërisht gratë dhe të rinjtë. Si lindi kjo iniciativë dhe cilat janë historitë që të kanë prekur më shumë?
Kjo qendër lindi nga një ndjenjë urgjence për t’u dhënë zë atyre që shpesh ndihen të padukshëm. E ndjeva si detyrë që të krijoja një hapësirë për ndihmë dhe fuqizim, ku gratë dhe të rinjtë të ndiheshin të vlefshëm dhe të motivuar. Disa prej historive që më kanë prekur më shumë janë ato të grave që gjetën fuqinë për të rifilluar jetën nga e para, dhe të të rinjve që, nga humbja e shpresës, u kthyen në liderë në komunitetet e tyre.
Në një shoqëri ku shpesh gratë e mbuluara përballen me paragjykime, ti je kthyer në një zë të fortë kundër diskriminimit. Si i përgjigjesh stereotipeve dhe si ke parë të ndryshojë perceptimi publik ndër vite?
I përgjigjem stereotipeve me profesionalizëm, duke u përqendruar te puna dhe vlerat. Unë besoj se shembulli personal është më i fuqishëm se çdo debat. Perceptimi ka ndryshuar ngadalë, por pozitivisht. Tani, më shumë njerëz e kuptojnë që mbulesa nuk është një pengesë, por një zgjedhje që bashkëjeton me suksesin dhe kontributin qytetar.
Çfarë do të thotë për ty fjala GRUA? Po GRUA shqiptare? Po GRUA në karrierë?
Grua për mua do të thotë forcë, dhembshuri dhe aftësi për të shndërruar sfidat në mundësi. Gruaja shqiptare simbolizon qëndresën dhe krenarinë, një miks unik i traditës dhe modernitetit.
Grua në karrierë përfaqëson balancën mes ambicies dhe përgjegjësive, duke dëshmuar që suksesi nuk ka kufij gjinorë.
Cilat janë sfidat më të mëdha që një grua me profil publik dhe angazhim qytetar si ti, përballet në jetën politike dhe shoqërore në Shqipëri?
Sfidat janë të shumta: paragjykimet gjinore, mungesa e mbështetjes së mjaftueshme dhe pritshmëritë e papërshtatshme nga të tjerët. Por më e vështira është që shpesh duhet të punosh dyfish më shumë për të provuar që je e denjë. Megjithatë, kjo vetëm më ka bërë më të vendosur për të dëshmuar se gratë mund të jenë lidere të fuqishme dhe me ndikim.
Pse vendose të hysh në politikë aktive? Cili është modeli që të frymëzon dhe dëshiron të ndjekësh?
Vendosa të hyj në politikë sepse e kuptova që ndryshimi nuk vjen duke pritur, por duke vepruar. Dua të jem një zë për ata që nuk dëgjohen. Modeli që më frymëzon është ai i liderëve që udhëheqin me ndershmëri, vizion dhe përkushtim ndaj popullit, si Nelson Mandela dhe liderë të tjerë që kanë luftuar për drejtësi dhe barazi.
Cili është mesazhi yt për vajzat dhe gratë që kanë ëndrra të mëdha, por ndihen të kufizuara nga paragjykimet apo kushtet sociale?
Mos lejoni që zërat e tjerë të heshtin ëndrrat tuaja. Ju jeni më të forta se pengesat që hasni. Besoni te vetja, ndërtoni një rrjet mbështetës dhe mos harroni: çdo hap, sado i vogël, është një hap drejt realizimit të ëndrrave tuaja. Ju mund të jeni ndryshimi që dëshironi të shihni në botë!
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
