Fokusi kryesor i qeverisë në planin 300-ditor do të jetë në rritjen e shpejtësisë dhe mbështetjes politiko-financiare për inovacionin.
Kryeministri Edi Rama në një konferencë për shtyp deklaroi se në fillim të vjeshtës në platformën E-Albania do të futet sistemi i komunikimit të dejtpërdrejtë virtual.
Qytetarët nuk do të kenë më nevojë të presin përgjigje për mënyrën e aplikimit dhe problematikave të cilat lidhen me këtë gjë, pasi operatori virtual me modelin e Chat GPT do japë përgjigjet në kohë reale.
“Kemi vazhduar të punojmë në riorganizimin e qeverisjes për përcaktimin e prioriteteve të 300 ditëve aktive që nisin së shpejti. Fokusin kryesor do e vendosim te rritja e shpejtësisë dhe mbështetjes politiko-financiare për inovacionin.
Kemi riorganizuar strukturat administrative që do u bashkëngjiten nuklat e inovacionit. Kemi nisur projekte të rëndësishme duke vënë në shfrytëzim edhe risitë e inteligjencës artificiale.
Së shpejti në fillim të vjeshtës do u japim qytetarëve rezultatin e parë të kësaj risie me futjen e sistemit të komunikimit të drejtpërdrejtë virtual në platformën E-Albania. Nuk do ketë nevojë për të pritur përgjigje për mënyrën si aplikohet, problematikat e aplikimit sepse operatori virtual me modelin e chat GPT do jetë aty në kohë reale për përgjigjet”, tha kryeministri.
Ky i fundit deklaroi më tej se brenda një periudhe njëvjeçare i gjithë shërbimi E-Albania do të jetë i bazuar te inteligjenca artificiale dhe operatori do të jetë edhe vizualisht në komunikim me qytetarët.
“Do punohet për të zgjeruar modulin e të gjitha shërbimeve, jo vetëm me fazën e aplikimit, që brenda një viti i gjithë shërbimi i E-Albania të jetë i bazuar te inteligjenca artificiale dhe operatori të jetë dhe vizualisht në komunikim me qytetarët, jo person fizik.
Hapi i parë është kjo që thashë: vënia në dispozicion e qytetarëve që përdorin E-Albania të sistemit të komunikimit të drejtpërdrejtë me operatorin virtual për fazën e aplikimit, edhe për ato që janë pyetjet më të zakonshme, përgjigjet më të nevojshme, për ata që hyjnë në E-Albania”, tha kryeministri Rama.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
