Britania e Madhe po mundohet të frenojë emigracionin masiv të të rinjve nga Kukësi, Hasi e Tropoja. Për kurse dhe trajnime profesionale plot 8 milionë paund ka dhënë qeveria britanike për të rinjtë nga 3 bashkitë e veriut, të cilët e shikojnë emigrimin si mundësi të vetme për sigurimin e jetesës.
Teksa qindra të rinj nga Kukësi, Hasi e Tropoja kanë emigruar në Britani të Madhe dhe vijojnë të emigrojnë, qeveria britanike po mundohet ta frenojë këtë fenomen.
Britania ka vendosur që 8 milionë paund t’i investojë në Kukës, Has e Tropojë, me qëllim aftësimin e të rinjve për punë.
Lajmin e ka dhënë Ambasadori i Britanisë së Madhe Alastair King Smith gjatë një takimi me kryetarët e tre bashkive.
Qëllimi është që të nxitet punësimi i të rinjve, të cilët emigrimin drejt Britanisë e shikojnë si zgjidhjen e vetme.
Alastair King Smith: E dimë që kemi probleme me të rinjtë që nuk kanë mundësi të tjera dhe pastaj shkojnë në mënyrë të paligjshme dhe grupet e krimit të organizuar shfrytëzojnë këtë çështje.
Vetë diplomati përsëriti shqetësimin e shqiptarëve që shkojnë në Britani ilegalisht dhe përfshihen në krim të organizuar. Smith tha se, duhet të jetë një fushatë për aftësimin në punë, për punësim, jo vetëm fjalë e projekte por ndikim.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
