Rreth 20 mijë të rinj pritet të ndjekin kurset e Qendrës TUMO për teknologji dhe kodim këtë vit. Në konferencën e 4-të ndërkombëtare ICITTBT, kryebashkiaku Erion Veliaj theksoi se Tirana është gati të mirëpresë dy programe të reja studimi që do të lehtësojnë adoptimin e teknologjive të reja dhe krijimin e një ekonomie digjitale të qëndrueshme.
“Pres me padurim që këtë vit të kemi 20 mijë nxënës dhe nxënëse nga 12 deri në 18 vjeç që ndjekin kurset e TUMO-s. Për moshën nga 18 deri në 22 vjeç, do të sjellim projektin ‘Ecole 42’ nga Franca, ndërsa për ata mbi 22 vjeç do të kemi programin ‘Plug&Play’ nga Kalifornia. Me z. Granoff nga AADF diskutuam mbi fillimin e këtyre kurseve semestrin e ardhshëm dhe ta bëjmë Tiranën kampione në teknologji, ashtu siç është në turizëm, dizajn urban dhe fusha të tjera. Tirana po ecën më shpejt se çdo vend tjetër në teknologji dhe, natyrisht, i ka hije të jetë e para,” deklaroi Veliaj.
Tirana mblodhi ekspertë, studiues dhe biznese për të diskutuar zhvillimet më të fundit në Inteligjencën Artificiale, Robotikë, Siguri Kibernetike, Qytetet Inteligjente dhe Ekonominë Digjitale. Veliaj vuri në dukje rëndësinë e këtyre fushave për zhvillimin e qyteteve dhe përmirësimin e jetës së qytetarëve.
“Është një kënaqësi e jashtëzakonshme që Tirana është mbushur me aktivitete, por mbi të gjitha me konferenca si këto, që promovojnë digjitalizimin dhe kulturën e punëve të së ardhmes. Tirana sot është ekosistemi më interesant në Ballkan, me punësimin më të lartë në fushën digjitale dhe turizmin. Fëmijët nga mosha 12-18 vjeç e konsiderojnë arsimimin në Tumo si një të drejtë digjitale, me 1,600 deri në 2,000 prej tyre që marrin bursa të plota nga Bashkia. Kjo është thelbësore për Institutin Kanadez të Teknologjisë dhe për ata që investojnë në shkencat që prodhojnë punësimin e së ardhmes,” tha Veliaj.
Konferenca synon të krijojë mundësi të reja për bashkëpunim ndërkombëtar dhe të nxjerrë në pah rolin e Shqipërisë si një qendër e rëndësishme për inovacionin teknologjik në rajon.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
