Kompania Alphabet, kompania mëmë e Google, ka miratuar një paketë të re kompensimi për CEO-n Sundar Pichai, e cila mund të arrijë deri në 692 milionë dollarë gjatë tre viteve të ardhshme, duke e renditur atë mes drejtuesve më të paguar në botën e teknologjisë. Pjesa më e madhe e kësaj pakete nuk është pagë direkte, por aksione të lidhura me performancën e kompanisë, të cilat do të varen nga rritja e Alphabet në treg dhe nga sukseset e projekteve të saj të reja teknologjike.
Si strukturohet paga e re
Paketës së re i përkasin disa komponentë kryesorë:
- 126 milionë dollarë në aksione të bazuara në performancë (Performance Stock Units).
Këto aksione janë të lidhura me performancën e Alphabet në krahasim me kompanitë e indeksit S&P 100. Nëse kompania tejkalon pritshmëritë, kjo pjesë mund të arrijë deri në 252 milionë dollarë, ndërsa në rast performancash të dobëta mund të mos paguhet fare. - 84 milionë dollarë në aksione të kufizuara, të cilat do të shpërndahen gradualisht gjatë tre viteve, për sa kohë Pichai vazhdon të mbetet CEO i kompanisë.
- Pagë vjetore prej 2 milionë dollarësh.
Përveç këtyre, Alphabet ka shtuar edhe dy skema të reja që mund të arrijnë deri në 350 milionë dollarë, të lidhura me zhvillimin e dy projekteve të rëndësishme të kompanisë:
- Waymo, platforma e makinave autonome (robotaxi)
- Wing, shërbimi i dërgesave me dronë
Sipas planit të ri:
- Pichai mund të marrë aksione në Waymo me vlerë objektiv 130 milionë dollarë
- dhe 45 milionë dollarë aksione në Wing Aviation
Nëse këto projekte rriten më shumë se pritshmëritë, edhe këto shpërblime mund të dyfishohen deri në 200% të vlerës së tyre. Në total, kjo e çon paketën maksimale të mundshme të kompensimit në 692 milionë dollarë, ndërsa vlera bazë e saj arrin rreth 391 milionë dollarë.
Lexo edhe: Nafta mbi 100 dollarë për fuçi, G7 diskuton të hapë rezervat strategjike të arit të zi
Bordi i Alphabet thekson se këto stimuj janë të lidhur drejtpërdrejt me zhvillimin e projekteve të së ardhmes.
Sipas kompanisë: “Waymo dhe Wing po përballen me sfida të mëdha në fushën e automjeteve autonome dhe logjistikës me dronë dhe kanë bërë përparim të rëndësishëm nën drejtimin e Sundar Pichai. Nxitja e mëtejshme e lidershipit të tij është në interesin më të mirë të Alphabet dhe aksionerëve të saj.”
Që kur Sundar Pichai mori drejtimin e Google në vitin 2015, vlera e kompanisë është rritur ndjeshëm. Kapitalizimi i tregut i Alphabet është rritur nga rreth 535 miliardë dollarë në mbi 3.6 trilionë dollarë, duke arritur për një moment edhe mbi 4 trilionë dollarë në fillim të vitit 2026. Kjo rritje e ka bërë Pichai një nga drejtuesit më të suksesshëm në industrinë e teknologjisë dhe gjithashtu një miliarder.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
