Rritja e inovacionit dhe zgjerimi i shërbimeve digjitale ishte kryefjalë e Asamblesë së Përgjithshme të FED Invest zhvilluar në fund të muajit maj në Tiranë. Kryetarja e Këshillit Drejtues të SHKK FED Invest, Zana Konini, theksoi se, “me vizionin për financa të qëndrueshme, viti 2025 do të fokusohet në përmirësimin e ofertës sonë unike financiare, fuqizimin e kornizës së menaxhimit të riskut, thellimin e personalizimit të shërbimeve për anëtarët në çdo hap të rrugëtimit të tyre financiar dhe zgjerimin e anëtarësisë për të arritur sa më parë gurin kilometrik të 100 mijë anëtarëve”.
Kjo asamble sipas saj, është manifestim i vlerave tona të përbashkëta, i besimit dhe bashkëpunimit që na ka sjellë deri këtu. Përfshirja financiare për të gjitha segmentet dhe fuqizimi i komuniteteve lokale duket prioriteti i këtij organizmi të mikrofinancës.
Administratori i FED Invest Perlat Sulaj, theksoi forcimin e marrëdhënieve të institucionit me institucione financiare ndërkombëtare dhe me donatorë ndërkombëtarë gjatë vitit të fundit.“Kemi vazhduar të konsolidojmë marrëdhëniet me partnerët e huaj dhe kemi nisur projekte të reja që do të vijojnë të zbatohen edhe gjatë vitit 2025”, theksoi ai. Vitin e kaluar kreditimi nga FED Invest u rrit mbi 8%. “Institucioni ynë i mikrofinancës synon të jetë porta kryesore për sipërmarrësit e vegjël dhe të mesëm, si në zonat rurale ashtu edhe në ato urbane, për të marrë shërbime financiare, duke kontribuar në rritjen ekonomike përmes fuqizimit të fermerëve, të rinjve, grave dhe aktorëve të zinxhirit të vlerës”, theksoi Behar Gjoni, Drejtor Biznesi dhe Zëvendës administrator i FED Invest.
Lexo edhe:Era e VPN-ve në Shqipëri: Si po “dështon” ndalimi i TikTok, rriten shikimet e videove
Portofoli i kredive u rrit me 8.2%, duke arritur vlerën 6.65 miliardë lekë gjatë 2024, ndërsa të ardhurat operacionale u rritën me 8.8%. Rritja e kredidhënies ka ardhur kryesisht nga financimi i aktiviteteve mikro të konsoliduara dhe SME-ve, me një rritje prej 16%. Sektori i bujqësisë ka dominuar rritjen e portofolit të kredisë. Sipas Gjonajt, janë disbursuar 4,185 kredi të reja me vlerë 3.16 miliardë lekë, kryesisht në sektorët e bujqësisë, blegtorisë dhe shërbimeve. Produkti mikro ka zënë 68% të totalit të kredisë së disbursuar. Në fund të vitit 2024, portofoli i depozitave arriti 5.5 miliardë lekë (rreth 55 milionë euro), me një rritje prej 3% krahasuar me një vit më parë, ndërsa niveli i kredive me probleme zbriti në 6.1%.
Ky është takimi i dymbëdhjetë në historinë 33-vjeçare të institucionit, duke e vendosur atë si kooperativa financiare më e madhe dhe më e konsoliduar në vend, me mbi 97 mijë anëtarë dhe me 58 degë të shpërndara në të gjithë Shqipërinë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
