Çdo sipërmarrës, në një moment të jetës së tij, ka thënë: “Po ta dija sa e vështirë ishte kjo rrugë, ndoshta nuk do ta nisja kurrë.” Dhe megjithatë, ata që ia dalin, janë një lloj i veçantë njerëzish. Të vendosur, të përkushtuar dhe me një shikim të palëkundur përpara – gjithmonë me ritëm të lartë. E quani këmbëngulje, pasion apo thjesht kokëfortësi, por ajo që i dallon është fakti se ata nuk dorëzohen. Kanë investuar shumë nga vetja në ëndrrën që po ndërtojnë.
Ata që janë bërë serial-sipërmarrës e dinë tashmë që frika nga e ardhmja është vetëm një pengesë mendore. Dështimet e para i kanë mësuar se fundi i botës nuk vjen me një lajm të keq. Pengesat janë pjesë e lojës. Kur bien, ngrihen vetë dhe vazhdojnë. Kur dështojnë, i quajnë kokëfortë. Kur ia dalin, i thërrasin të palodhur. Por pjesa tjetër e ekipit nuk është gjithmonë si ju. Në vrullin e tyre, drejtuesit harrojnë shpesh se jo të gjithë në ekip ndajnë të njëjtën ndjesi. Për shumë nga anëtarët e ekipit, kjo nuk është një betejë personale, por thjesht puna e përditshme. Edhe pse mund të besojnë në mision, ata kanë familje, përgjegjësi dhe frikë për të ardhmen. Dhe kur bota është në ankth, ankthi ndikon te të gjithë. Një nga gabimet më të zakonshme të drejtuesve është se mendojnë se po i marrin të gjithë me vete në këtë udhëtim, kur në të vërtetë shumë prej anëtarëve të ekipit nuk kanë as idenë se çfarë po ndodh me të vërtetë në biznes.
Lexo edhe:Çfarë mund të mësojmë nga Arnold Schwarzenegger rreth lidershipit?
Mos e zbukuro lajmin e keq
Frika lind nga mungesa e informacionit. Ekipi ka nevojë të dëgjojë të vërtetën, direkt nga ju – pa e zbukuruar, pa e shmangur. Nëse ata kanë qëndruar me ju gjatë pandemisë dhe kohërave të vështira, atëherë meriton të jenë të informuar. Sidomos kur pasiguria ekonomike është kaq e lartë dhe çdo lajm i keq ndikon në mënyrën se si punojnë dhe ndihen. Ju mund të jeni gati të rrezikoni gjithçka, por shumë nga punonjësit tuaj nuk janë të sigurt as për vendin e tyre të punës pas 6 javësh. Dhe kjo është një shqetësim i përditshëm për ta, që ndikon edhe në motivimin dhe performancën e tyre. Nëse doni që ata të fokusohen dhe të japin më të mirën e tyre, duhet të flisni qartë dhe të sinqertë. Këto janë 5 mesazhe që duhet t’u përcillni sa më parë:
1. Askush nuk do pushohet nga puna sepse ka bërë një gabim
Gabimet janë pjesë e rritjes. Ato ndodhin, mësojmë prej tyre dhe vazhdojmë përpara. Ne e quajmë këtë “amnezi në lojë” – aftësia për të lënë pas të kaluarën dhe për të ecur përpara. Por fshirja ose fshehja e një problemi është gjëja e vetme që nuk tolerohet.
2. Dështimet ndodhin dhe janë të pritshme
Asgjë e madhe nuk ndërtohet pa sfida. Por ka dy lloj dështimesh që nuk pranohen: të mos kërkosh ndihmë kur të duhet dhe të mos ofrosh ndihmë kur je i thirrur. Jemi një ekip – askush nuk i bën gjërat i vetëm.
3. Ne jemi ende në këmbë
Pesë vjet pas pandemisë, kompania është ende aktive. Dhe kjo është një arritje e madhe për të gjithë ne. Puna jonë ka kuptim, për ne dhe për të tjerët. Po ndërtojmë dhe rigjallërojmë lidhjet tona me klientët, partnerët dhe investitorët që na kanë qëndruar pranë.
4. Rruga e startup-it është gjithmonë me pengesa
Nuk ka rrugë të sheshtë për sipërmarrësit. Por ne do të përballojmë çdo stuhi të ardhshme së bashku, si një ekip që ndan barrën dhe suksesin.
5. Faleminderit – një fjalë që nuk thuhet sa duhet
Tregojini ekipit sa shumë i vlerësoni. Për punën, përkushtimin dhe sakrificat e tyre. Asnjëherë nuk është tepër ta thuash. Falë tyre jeni ende në lojë.
Në fund të ditës, nuk ka asnjë formulë magjike për të kaluar kohë të vështira. Por ka një element që nuk dështon kurrë: komunikimi i sinqertë dhe njerëzor. Sidomos kur jeta nuk është e thjeshtë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
