Programi DiscoverEU i Komisionit Europian ka publikuar thirrjen për aplikim, për të fituar udhëtimin falas me tren përgjatë Europës. Të përzgjedhurit do të marrin biletën falas për udhëtimin mes datave 1 korrik 2024 dhe 30 shtator 2025, për një periudhë 30-ditore.
Kujdes! Të martën, datë 30 prill, ora 12:00 është afati i fundit i aplikimit.
Edhe të rinjtë e lindur nga nga 1 korriku 2005 deri më 30 qershor 2006, me shtetësi ose vendbanim në një nga shtetet anëtare të Bashkimit Europian ose në një nga vendet e treta të lidhura me programin Erasmus+ (Islanda, Lihtenshtajni, Maqedonia e Veriut, Norvegjia, Serbia dhe Turqia) kanë të gjithashtu të drejtë të aplikojnë.
Çfarë përmban aplikimi?
Kandidatët do të duhet t’i përgjigjen një kuici me gjashtë pyetje në Portalin Europian të Rinisë. Pastaj, komisioni do të rendisë kandidatët në bazë të përgjigjeve.
Bashkë me biletën falas, do të marrin një Kartë Rinore Europiane e cila do t’u japë akses në ulje çmimesh për vizitat kulturore, aktivitetet mësimore, sportet, transportin, akomodimin dhe ushqimin.
Pjesëmarrësit mund të udhëtojnë vetëm ose në një grup deri në 5 persona. Duhet të caktohet një drejtues grupi për të plotësuar formularin e aplikimit dhe për t’iu përgjigjur kuicit.
Gjatë aplikimit, drejtuesi i grupit merr një kod të cilin duhet t’ua transmetojë anëtarëve të grupit për t’i lejuar të regjistrohen online dhe të plotësojnë të dhënat e tyre personale.
Komisioni filloi DiscoverEU në qershor 2018 dhe më pas e integroi atë në programin Erasmus+ 2021-2027. Që nga viti 2018, janë shpërndarë 284.000 bileta. Përvoja e DiscoverEU u mundësoi të rinjve të kuptojnë më mirë kulturat e tjera, historinë europiane dhe të përmirësojnë aftësitë gjuhësore.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
