Çfarë është Netflix?
Netflix është rrjeti më i madh i shërbimeve televizive në internet me mbi 70 milion përdorues nga 190 shtete të botës. Në këtë platformë mund të gjeni mbi 125 milion orë filma, seriale dhe dokumentarë. Anëtarët mund të shikojnë sa, kur dhe ku të duan programet e tyre të preferuar, mjafton një lidhje interneti. Që nga viti i themelimit të Netflix në 2007 në ShBA, shërbimi filloi të përhapet në fillim në Kanada, Amerikën Latine, Europë, Australi, Zelandën e Re, Japoni dhe më gjerë. Netflix është i pranishëm tani dhe në Shqipëri, Kosovë, Mal të Zi dhe Maqedoni.
A ka platformë të ngjashme si Netflix?
Hulu, Amazon Instant Video dhe iTunes janë tri platforma të tjera të ngjashme me Netflix. Në disa raste këto platforma kanë filma ose seriale që nuk shfaqen në Netflix. Netflix ështe platformë që ofrohet në më shumë shtete dhe përdor më shumë titra në gjuhë të huaja. Së shpejti Netflix mund të ofrojë filma, seriale dhe dokumentarë me titra shqip.
Si të bëhem pjesë e Netflix?
Për të përdorur Netflix ju duhet të regjistroheni në faqen www.netflix.com. Për këtë hap ju duhet të keni një adresë elektronike dhe një kartë debiti ose krediti, pasi pagesa kryhet online. Ju keni mundësi të zgjidhni 3 paketa të ndryshme : Basic, Standard dhe Premium duke filluar nga 7.99 Euro. Mos harroni, muaji i parë është falas.
Në çfarë pajisjesh funksionon Netflix?
SmartTv
N.q.s keni një televizor të zgjuar ose smartTv në shtëpinë tuaj nuk ju nevojitet pajisje tjetër për të parë Netflix. Mjafton të keni internet Wi-Fi. Televizorët e zgjuar e kanë të instaluar Netflix paraprakisht. Në rast të kundërt ju thjesht duhet të bëni një kërkim për Netflix dhe ta instaloni në televizorin tuaj.
Po n.q.s nuk kam SmartTv?
N.q.s keni një televizor me portë HDMI, nuk duhet të shqetësoheni. Ju duhet të blini një pajisje të quajtur ChromeCast që i ngjan një Flash Drive. Kjo pajisje është prodhuar nga Google dhe bën të mundur lidhjen në rrjet të televizorit tuaj me aparatin celular, tabletin ose laptopin. Ju mund të përdorni Netflix në celularin apo tabletin tuaj dhe automatikisht pa nevojën e një kablli, filmi apo seriali shfaqet në televizor.
Një tjetër mënyrë mund të jetë lidhja e laptopit me televizorin nëpërmjet nje kablli HDMI.
Celularë dhe Tablet
Netflix-in mund ta gjeni si aplikacion në sistemet Android, iOS dhe Windows. Ju mund ta gjeni këtë aplikacion falas në Google Play, App Store ose Marketplace për ta shkarkuar dhe instaluar. Celulari ose tableti tuaj duhet të jetë i lidhur me internet dhe kaq mjafton për të shijuar programet e Netflix.
Laptop dhe kompjuter
N.q.s keni një laptop ose kompjuter ju mund ta përdorni Netflix nëpërmjet faqes së internetit www.Netflix.com. Mjafton të fusni të dhënat tuaja, një adresë e-mail dhe fjalëkalimin që keni zgjedhur gjatë regjistrimit. Kështu mund të shihni programet tuaja të preferuara.
Pajisjet e lojrave elektronike
Ju mund të përdorni Netflix në pajisjet e lojrave elektronike si: PS3, PS4, Xbox360, Xbox One, Wii dhe Wii U n.q.s keni një të tillë në shtëpi. Mjafton që të instaloni aplikacionin Netflix nga dyqanet online të këtyre lojrave elektronike.
Netflix në tregun shqiptar
Kompanitë shqiptare që ofrojnë shërbime të ngjashme si Netflix nuk mungojnë në tregun tonë. Kompania Digitalb dhe Tring janë të mirënjohura për shërbimet e tyre në tregun mediatik. Së fundi këto kompani po investojnë në teknologjinë IPTV ose televizioni nëpërmjet internetit. Pyetja është: A do të ndryshojë strategjia e tyre pas futjes në treg të Netflix?
Netflix së pari do të përdoret nga të apasionuarit e filmave, dokumentarëve, serialeve dhe njohës të mirë të gjuhës angleze. Në momentin që Netflix do të mundësojë titra në gjuhën shqip, numri i të interesuarve do të rritet shpejt dhe kompanitë shqiptare do ta shohin Netflix-in si një lojtar të rëndësishëm në tregun shqiptar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
