Këshilli i Ministrave ka miratuar një vendim të ri që sjell ndryshime të rëndësishme në rregulloren për klasifikimin dhe funksionimin e strukturave akomoduese në sektorin e turizmit. Sipas vendimit, çdo sipërmarrës që operon në këtë fushë do të duhet të pajiset me një certifikatë klasifikimi, duke e bërë këtë dokument një kërkesë ligjore të detyrueshme për të ofruar shërbime akomodimi.
Vendimi i ri parashikon që aplikimet për certifikim, rinovim apo ndryshim të të dhënave, do të kryhen vetëm në mënyrë elektronike, përmes portalit qeveritar “e-Albania”. Po ashtu, të gjitha përgjigjet dhe komunikimet zyrtare nga administrata shtetërore ndaj bizneseve do të jepen gjithashtu në formë elektronike, me vulë dhe nënshkrim digjital.
Në dokumentin zyrtar theksohet se, pas ngritjes dhe funksionimit të plotë të Sistemit të Informacionit për Menaxhimin e Turizmit, çdo procedurë do të kalojë ekskluzivisht përmes këtij sistemi. Deri atëherë, praktikat do të vijojnë sipas rregullave aktuale.
Ndër ndryshimet kryesore janë:
-Detyrimi për çdo subjekt turistik që ofron shërbime akomodimi të aplikojë për certifikatë klasifikimi.
-Komunikimi zyrtar me institucionet do të zhvillohet vetëm në formë elektronike.
-Komisioni përkatës do të klasifikojë strukturat akomoduese bazuar në kritere dhe kushte të përcaktuara në aneksin përkatës të vendimit.
-Çdo ndryshim në të dhënat e paraqitura për marrjen e certifikatës duhet të deklarohet brenda 7 ditëve përmes “e-Albania”.
Burimi: Euronews
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
