Varësia e ekonomisë në sektorin e ndërtimit në Shqipëri ishte më e larta në Europë në vitin 2023, sipas të dhënave të fundit nga Eurostat. Shpenzimet nominale për ndërtimin në raport me Prodhimin e Brendshëm Bruto (PBB) arritën 19.1% në vitin 2023, duke u rritur nga 18.8% në vitin e kaluar. Kjo shifër është më e larta në Europë, ndërsa mesatarja e Bashkimit Europian për këtë tregues është rreth 11%.
Lexo: Destinacionet e fshehura në Ballkan për Nomadët Dixhitalë: Zbulo vendin shqiptar…
Rumania renditet e dyta me 17.9%, ndjekur nga Suedia me 15.7%. Në rajon, pas Shqipërisë renditen Maqedonia e Veriut me 13.3%, Bosnja me 12.5%, Mali i Zi me 11.4% dhe Serbia me 9.6%. Greqia mbyll listën në Europë me shpenzime nominale të ndërtimit të barabarta me 4.9% të PBB-së.
Ndërtimi dhe sektori i pasurive të paluajtshme kanë qenë faktorë kryesorë që kanë ndikuar në rritjen ekonomike të vitit 2023, duke kontribuar në gati 50% të rritjes së PBB-së, sipas të dhënave të INSTAT. Sektori i ndërtimit arriti një rritje prej 9.7%, duke shënuar një vlerë prej 235 miliardë lekësh ose rreth 2.2 miliardë euro. Transaksionet e pasurive të paluajtshme gjithashtu treguan një performancë të fortë, duke arritur 137 miliardë lekë ose rreth 1.3 miliardë euro në vitin e kaluar, një nga nivelet më të larta të regjistruara ndonjëherë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
