Jeff Bezos do të shesë deri në 25 milionë aksione të Amazon, sipas një dosjeje të re të dorëzuar në Komisionin Amerikan të Letrave me Vlerë (SEC).
Amazon bëri të ditur të premten, përmes raportit tremujor të dorëzuar në SEC, se themeluesi miliarder i kompanisë ka miratuar një plan tregtimi “në përputhje me rregulloren 10b5-1(c)” që në fillim të muajit të kaluar, për të shitur deri në këtë sasi aksionesh.
Vlera e këtyre 25 milionë aksioneve të Amazon ishte mbi 4.7 miliardë dollarë mëngjesin e së premtes.
Plani i ri i lejon Bezos-it, i cili e themeloi Amazon më shumë se tre dekada më parë dhe aktualisht shërben si kryetar ekzekutiv i kompanisë, të shesë aksionet “gjatë një periudhe që përfundon më 29 maj 2026, në varësi të disa kushteve”, sipas raportit tremujor.
Lexo edhe:Warren Buffett largohet nga drejtimi i Berkshire Hathaway pas 60 vitesh
Një dokument tjetër i dorëzuar në SEC tregon se Bezos zotëronte drejtpërdrejt mbi 909.4 milionë aksione të gjigantit të tregtisë elektronike deri më 3 mars.
Kjo nuk është hera e parë që themeluesi i Amazon ndërmerr plane për shitjen e aksioneve. Më parë, në shkurt 2024, ai kishte shitur 50 milionë aksione përmes disa fazave të ndryshme, duke arkëtuar mbi 8.5 miliardë dollarë.
Pjesa më e madhe e pasurisë së tij, e cila kap vlerën e mbi 200 miliardë dollarëve, vjen pikërisht nga aksionet e tij në Amazon. Mëngjesin e së premtes, Forbes e vlerësonte pasurinë e tij personale në 205.4 miliardë dollarë, duke e renditur si personin e dytë më të pasur në botë, pas CEO-së së Tesla, Elon Musk.
Përveç Amazon, Bezos është pronar i The Washington Post dhe themelues i kompanisë hapësinore Blue Origin.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
