Ka vetëm pak ditë që ka hyrë në fuqi ligji ‘Për Pronësinë Industriale’, i cili u miratua në Shkurt të këtij viti. Drejtoria e Përgjithshme e Patentave dhe Markave ka bërë me dije se tashmë duhet të nisin aplikimet për të bërë të mundur regjistrimin e objekteve që do të konsiderohen si pronësi intelektuale, duke iu referuar ligjit të ri.
Ai parashikon lehtësim të procedurave të ekzaminimit, si dhe krijimin e një mjedisi ligjor për përmirësimin e shërbimeve elektronike dhe të komunikimit.
Bizneseve, por edhe individëve do t’u krijohet mundësia që të aplikojnë online. Me regjistrimin do të bëhet e mundur edhe sigurimi i objekteve të pronësisë intelektuale si dhe përdorimi i tyre si kolateral, me qëllim që të marrin vlerën e duhur në treg.
Gjithashtu ligji i ri parashikon edhe krijimin e bazës ligjore për licencimin e ekspertëve të pronësisë intelektuale për nevojat e proceseve gjyqësore dhe të hetimit.
Nga ana tjetër, do të saktësohen procedurat për regjistrimin e treguesve gjeografikë dhe emërtimeve të origjinës, me qëllim eliminimin e problemeve të hasura në praktikë.
Mbrojtja nga falsifikimi i produkteve do të ndihmojë në krijimin e një tregu të sigurtë për prodhuesit vendas, si dhe më shumë cilësi për konsumatorët. Identifikimi dhe regjistrimi i tyre do të nxisë rritjen ekonomike në zonat rurale, si dhe eksportin e produkteve shqiptare në tregun e huaj, duke i bërë ato të mirënjohura në botë.
Gjatë vitit të kaluar, numri i aplikimeve për regjistrimin e markave tregtare arriti në shifrën 1.055, ndërsa numri i aplikimeve për patentimin e shpikjeve nga nënshtetas shqiptarë u llogarit në 27.
Burimi: monitor.al
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
