Pas tensioneve të reja me Izraelin dhe ndërprerjes së internetit në të gjithë vendin, Elon Musk ka bërë të ditur se sistemi i tij satelitor i komunikimit, Starlink, është aktivizuar në Iran. Lajmi u konfirmua përmes një postimi në platformën X, ku Musk shkroi shkurt: “Rrezet janë ndezur”, duke iu referuar sinjalit të internetit që vjen nga satelitët e orbitës së ulët.
Irani ndërpreu internetin në rang kombëtar të premten, pasi Izraeli ndërmori një seri sulmesh ajrore në territorin e tij, si kundërpërgjigje ndaj akuzave për zhvillimin e programit bërthamor iranian. Ministria e Komunikimit në Teheran deklaroi se “kufizimet janë të përkohshme dhe do të hiqen sapo të rikthehet normaliteti”.
Lexo edhe: Huawei po fiton terren, a rrezikon SHBA të humbasë garën për inteligjencën artificiale?
Starlink është përdorur më parë në situata të krizës për të ofruar akses në internet në zonat e izoluara apo ku infrastruktura tradicionale është shkatërruar ose bllokuar – si në Ukrainë dhe Gaza – duke u kthyer në një instrument të ri të fuqishëm në luftërat e shekullit XXI.
Ndërkohë, tensionet midis Iranit dhe Izraelit vazhdojnë të përshkallëzohen. Të dielën në mëngjes, të dy vendet raportuan sulme të reja reciproke. Sipas autoriteteve izraelite, të paktën 10 persona, përfshirë fëmijë, humbën jetën pas goditjeve me raketa nga Irani. Ekipet e kërkim-shpëtimit në Izrael po punojnë në rrënojat e ndërtesave të shkatërruara, në kërkim të të mbijetuarve.
Kryeministri izraelit Benjamin Netanyahu deklaroi se kundërpërgjigjja e deritanishme ishte vetëm një paralajmërim dhe se “Irani nuk ka parë asgjë ende”. Forcat izraelite kanë kërkuar nga civilët iranianë që jetojnë pranë depozitave të armëve të evakuohen menjëherë.
Ish-presidenti amerikan Donald Trump, në një mesazh në platformën Truth Social, paralajmëroi Teheranin të mos godasë interesat amerikane: “Nëse sulmohemi, forcat tona do të reagojnë me një fuqi që nuk është parë më parë.” Ai shtoi se konflikti mund të zgjidhet lehtësisht me një marrëveshje mes Iranit dhe Izraelit, nëse ekziston vullneti politik.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
