Logical Albania, kompania që ofron zgjidhje softuerike në tregun shqiptar prej 12 vitesh, i ka kushtuar gjithmonë një vëmendje të veçantë rolit të vajzave, qoftë në role drejtuese qoftë në ato implementuese.
Gjatë takimit ata shprehen që: “54% e stafit janë vajza dhe përbëjnë 50% të roleve kyçe në kompani. Çdo ditë prezenca e tyre e bën punën më të bukur, më harmonike, më të saktë, më dinamike. Prania e vajzave sjell në atmosferën e përditshmërisë emocionet aq të nevojshme në çdo ambient. Ne kemi disa vite tashmë që investojmë në kauza të përgjegjësisë sociale, dhe një ndër këto kauza është që vajzat dhe gratë shqiptare të kenë hapësirat e duhura për të zhvilluar potencialin e tyre. Kjo është edhe arsyeja e këtij bashkëpunimi.”
Me një fokus të veçantë tek përgjegjësia sociale, rritja profesionale dhe trajtimi miqësor i punonjësve, në ditë të caktuara mund të gjeni në ambientet e tyre dhe fëmijë. Kur i pyesim se cila është arsyeja e kësaj, Gentian-i përgjigjet: “Gruaja, përveçse një profesioniste shumë e mirë ka dhe rolin shumë të shenjtë të të qenit nënë. Përveç mbështetjes që mundohemi tu japim që fazën e kalimit nga të qenit pa fëmijë në të bërit nënë, i shtyjmë që ti sjellin fëmijët në zyrë që të shohin ambjentet ku punon mami kur i lë në çerdhe. Kjo ndihmon për të parë dhe një dimension më njerëzor përveç gruas në profesion. Mendojmë që e humanizon punën. Ne madje po organizojmë me burimet njerëzore ditën kur punonjësit që janë bërë prindër të sjellin të gjithë fëmijët e tyre. Pikërisht për atë që përmendëm më lart.”
Z. Gentian Gjiknuri, sipërmarrës, drejtues i Logical, tregon se kompania zhvillon disa politika dhe merr disa nisma që shkojnë në drejtimin e fuqizimit të gruas, si një rol i rëndësishëm për qëndrueshmërinë dhe rritjen e suksesshme të sipërmarrjes.
“Krahas politikave sociale miqësore që zhvillojmë brenda kompanisë, ne synojmë të investojmë shumë në rritje dhe të fuqizojmë potencialet e reja. Kemi qenë pjesë e shumë panaireve të punës për të zbuluar talentet dhe kemi marrë pjesë në shumë programe zhvillimi, që nxisin investimet, inovacionin dhe fuqizimin e gruas”.
Ndër angazhimet aktuale të kompanisë është mbështetja e qendrës Kallz për zhvillimin e programit të trajnimeve të mbi 50 startup-eve drejtuar nga gra dhe vajza. Pas trajnimeve, 10 nga këto startup-e do të marrin pjesë në konkursin shqiptar të Women Startup Competition, i cili zhvillohet nga qendra Kallz.
“Ne jemi entuziastë në mbështetjen e këtij programi, duke parë së pari nevojën e lartë të grave dhe vajzave, për t’u pajisur me më shumë njohuri në fushën e biznesit dhe për t’u treguar atyre se nuk janë vetem në këtë rrugëtim”, tha Z. Gjiknuri.
Logical Albania është shtëpia e softuerëve për bizneset. Kompania ofron zgjidhje biznesi që nga tetori i vitit 2012 dhe sot ka mbi 900 klientë, të cilët operojnë në mbi 2500 pika shitjeje në Shqipëri, Kosovë, Maqedoninë e Veriut, Malin e Zi dhe Bosnje-Hercegovinë. Logical u shërben bizneseve që operojnë në industrinë e shitjes me pakicë, mikpritjen dhe logjistikën, duke integruar zgjidhjet softuerike me sistemet financiare.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
