Mark Zuckerberg dhe Priscilla Chan bëhen prindër të një vajze. Pavarësisht se i kanë uruar mirëseardhjen në jetë vajzës së tyre javën e kaluar, lajmi është bërë publik vetëm të Martën në faqen e Facebook të Zuckerberg.
Në mes të gëzimit të mbërritjes në jetë të fëmijës së tyre të parë, të cilën e kanë quajtur Max, Mark Zuckerberg ka deklaruar se 99% e aksioneve të Facebook do të shkojnë për bamirësi. Mesa duket ardhja në jetë e vajzës së tyre, Max, i ka bërë prindërit e rinj të “ndjeshëm” ndaj kauzave sociale si mirëqenia e fëmijëve nëpër botë. Në një letër “drejtuar” Max-it, ai shkruan:
“E dashur Max,
Nëna jote dhe unë nuk kemi ende fjalë për të përshkruar shpresat që na jep ti për të ardhmen. Jeta jote ‘e re’ është kaq shumë premtuese, dhe ne shpresojmë që ti do të jesh e lumtur dhe e shëndetshme për ta eksploruar atë në të gjitha mënyrat. Që tani na ke dhënë arsye për të reflektuar mbi botën që dëshirojmë për ty në një të ardhme.
Si çdo prind, ne duam që të rritesh në një botë më të mirë se kjo e sotmja.
Ndërsa kryefjala e çështjeve sot në botë, fokusohet mbi të këqijat e saj, ajo sot po përmirësohet. Njerëzit po bëhen më të shëndetshëm. Varfëria po zvogëlohet. Njohuritë po rriten. Njerëzit po krijojnë gjithmonë e më shumë lidhje mes tyre. Progresi teknologjik i ditëve të sotme do të thote se jeta jote do të jetë ndjeshmërisht më e lehtë se ajo e jona sot.
Ne do të bëjmë pjesën që na takon për ta bërë këtë realitet, jo vetëm për shkak të dashurisë që kemi për ty, por edhe për shkak të përgjegjësisë morale ndaj të gjithë fëmijëve të brezit të ardhshëm.”
Këto kanë qenë disa nga fjalët e letrës së Zuckerberg drejtuar së bijës, Max. Ai ka thënë se do të dhurojë për bamirësi pasurinë e tij “Iniciativës së Chan Zuckerberg”, pasi çifti Zuckerberg dëshiron një botë më të mirë për vajzën e tyre. Vlera korrente e pjesës së pasurisë së Facebook, e cila do të dhurohet vlerësohet të jetë rreth 45 miliardë $ (30 miliarde £).
Në letrën e tij Mark Zuckerberg përmend se Iniciativa e Chan Zuckerberg është “të avancojë potencialet e njerëzimit dhe të promovojë barazinë për gjeneratën e ardhshme të fëmijëve”.
Mund të lexoni edhe artikullin: Jeta e mrekullueshme e Mark Zuckerberg
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
