Eni Muça
Në Tiranë, ka mbërritur një nismë e re që premton të ndryshojë peizazhin e sipërmarrjes në Shqipëri: Startup Fund K4S6, I themeluar nga Kevin Sekniqi, një sipërmarrës i suksesshëm i diasporës, fondi ka për qëllim të nxisë zhvillimin e ekosistemit të startup-eve në vend, duke ofruar mbështetje dhe financime të konsiderueshme për ide inovative.
I riu shqiptar, ka folur për Businessmag dhe më tej në Top Channel si edhe në takimin me komunitetin e Startup Grind rreth misionit të tij për të zbuluar dhe mbështetur talentet e reja në Shqipëri.
Televizioni Top Channel e paraqet Kevin si shqiptarin që ka zbuluar sukses të jashtëzakonshëm në “Tokën e Ëndrrave” përtej oqeanit. Edhe pse vetëm 30 vjeç kjo nuk e pengoi gjeniun shqiptar që të bashkëthemelonte një nga startup-et më të suksesshme në Amerikë, në fushën e Blockchain (Zinxhirët e Blloqeve). Si themelues dhe shefi i teknologjisë në kompaninë AvaLabs, Forbes e shpalli Sekniqin si liderin më me influencë në fushën e Financës në edicionin e saj “30 më të mirët nën 30 vjeç”. Shpirti i sipërmarrjes sipas tij është i lindur, por qyteti ku kaloi adoleshencën, Shkodra, ia dha lirinë për të ëndërruar dhe ai thotë se nuk do ta ndërronte me asgjë.
Ndërkohe, në viziten e tij të fundit në Tiranë, Kevin u ftua nga komuniteti i startupeve, Startup Grind Tirana. Me mbi 80 adhurues të teknologjisë të pranishëm, aktiviteti u kthye në një burim frymëzimi dhe informacioni. Ky prezantim i dha pjesëmarrësve një kuptim më të thellë të bazave që e çuan Kevin në krijimin e Avalabs, një platformë revolucionare blockchain. Kevin ndau histori personale që nxirrnin në pah interesat e tij të hershme dhe momentet kyçe që ndezën shpirtin e tij sipërmarrës.
Kevin gjithashtu foli rreth projektit të tij më të ri, K4S6 Startup Fund, i cili ka për qëllim të nxisë zhvillimin e ekosistemit të startupeve në vend duke ofruar mbështetje dhe financime të konsiderueshme për ide inovative.
Si funksionon K4S6?
Startup Fund K4S6 ka si mision të ndikojë zhvillimin e mëtejshëm të ekosistemit të startup-eve shqiptare, duke mbështetur dhe ushqyer idetë novatore. Ekipi drejtohet nga një grup sipërmarrësish shqiptarë dhe shqiptaro-amerikanë me pasion për të mbështetur mendjet më të ndritura që Shqipëria ka për të ofruar.
Ky projekt ka një qasje unike me dy nivele, përkatësisht Startup Track dhe Fellows Track, i përqëndruar ekskluzivisht në tregun shqipfolës.
Të rinjtë dhe startup-et, nëpërmjet këtyre programeve do të përfitojnë financime të konsiderueshme.
Financimi varion nga $25,000 deri në $250,000 në varësi të seriozitetit dhe pjekurisë së startup-it. Pavarësisht sektorit, qoftë teknologji, shëndetësi, apo ndonjë industri tjetër, ofrohet kapital dhe ekspertiza e nevojshme për të zgjeruar vizionin tuaj. Kushti minimal për aplikim është zakonisht një MVP (Minimum Viable Product). Nuk është e nevojshme të keni akumuluar një bazë përdoruesish, megjithëse kjo është një plus. Ajo që ka rëndësi është të keni treguar qartësisht aftësinë për të kaluar nga “zero në një” me idenë tuaj.
Financimi është një tarifë fikse prej $5,000 në vit, e garantuar për dy vjet, ku kryesisht studentët apo të rinj të çdo moshe kanë mundësinë të thellohen tek ideja e tyre plotësisht, me opsion për rinovim për dy vjet shtesë nëse ka progres të dukshëm drejt materializimit të një ideje. Ky rrugëtim është për ëndërrimtarët që ende nuk kanë një koncept të qartë ndaj do t’ju ofrohen pagesa në formë granti dhe një mjedis inkurajues për të eksploruar dhe zhvilluar idetë e tyre novatore, pa presionin nëse idetë rezultojnë fitimprurëse apo jo për momentin. Faktorët e rëndësishëm janë dëshira dhe nxitja për të ndërtuar të ardhmen.
K4S6 nuk është thjesht financim. Ky është vetëm hapi i parë.
Ndërsa të rinjtë apo startup-et do të punojnë për të ndërtuar produktin e tyre, do të krijojnë ekipin e tyre apo do të eksplorojnë ide të reja, do t’ju ofrohen këshilla, mentorim, prezantime dhe njohje të reja për t’i ndihmuar në zgjerimin e rrjetit profesional dhe hapjen e perspektivave të reja për të ndërtuar biznese të reja me mundësi për t’u rritur ndërkombëtarisht.
Ky program sapo ka filluar dhe informacionet mbi kriteret e aplikimit janë listuar në faqen e internetit: https://www.k4s6.io/program-details
Aplikimet & Përzgjedhja
Pas grumbullimit të të gjitha aplikimeve për të dyja nivelet, secili aplikim do të filtrohet dhe pas kësaj vetëm të përzgjedhurit e kësaj faze do të kenë mundësi të kalojnë në fazën tjetër të intervistimit dhe më pas financimit dhe përkujdesjes që çdo ide apo startup të shkëlqejë.
Nëse jeni gati të ndërtoni të ardhmen dhe të lini gjurmë në ekosistemin global të startupeve, K4S6 është vendi i duhur për ju.
Aplikoni Tani për të qenë pjesë e një udhëtimi transformues drejt suksesit!
Ky artikull u publikua më parë në numrin 35 të Revistës Businessmag.al Ju mund të abonoheni online për të shkarkuar revistën.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
