Si po ndryshon të bërit biznes në kushtet e sotme? Çfarë masash duhet të marrin kompanitë për një organizim më të mirë? Cilat janë mjetet e përshtatshme për të bashkëpunuar? Si të krijojmë kulturën e të punuarit në distancë? Si po ndryshon komunikimi marketing në këto kushte?
Lexo: Webinar: Biznes në kohën e Koronavirusit
Këto dhe shumë çështje të tjera lidhur me të bërit biznes në këto ditë të vështira u trajtuan në webinarin e së premtes nga panelistët Gerti Boshnjaku dhe Tomi Kallanxhi, moderuar nga Dritan Mezini.
Paneli ndau me audiencën online, mënyrën sesi bizneset po funksionojnë duke punuar në distancë.
Webinari u përqëndrua tek ndërmarrjet e reja, bizneset e vogla dhe të mesme.
“Këto 2 javë kanë qënë shumë të vrullshme dhe të ngarkuara. Ne në BusinessMag e kemi ndjekur situatën dhe kemi bërë një përmbledhje të të rejave më të fundit në Shqipëri. Fokusi në këtë kohë, duhet të kalojë tek bizneset e reja dhe bizneset e vogla”, u shpreh Gerti.
Ai gjithashtu solli shembullin e sondazhit të Silvana Xhekës, e cila tregonte se 60% e punonjësve po punojnë në distancë. Anketa ishte realizuar në Tiranë me 470 punonjës. 66% e tyre përdornin postën elektronike dhe 42 video konferencat. Ky sondazh gjithashtu tregon një trend në rritje të mjeteve të internetit.
Por, çfarë qasje duhet të marrin bizneset? Bizneset, sot duhet të përgatisin strukturat e brendshme, duke mbledhur gjithë ekipin online, të adoptohen rregullat, të cilat ishin caktuar më parë, të caktohen rregulla të reja, të përcaktohen kanalet ku duhet të punohet. Gjithashtu duhet të përgatisin komunikimin në mënyrën e re të të fuksionuarit për partnerët jashtë saj, siç janë: klientët, partner biznesi, furnitorët.
Të tregohet disiplinë në ndjekjen e rregullave. Një element i rëndësishëm diskutimi janë edhe mjetet e komunikimit. Panelistët treguan disa mjete komunikimi që bizneset e reja ose të vogla mund të përdorin në këtë kohë, si: SlackHQ, Microsoft Teams, Jira, Gmail, Google Drive.
Lexo: Webinar, Sfida e të punuarit në distancë
Tomi foli për vlerat e përdorimit nga bizneset e vogla ose të reja të Google Forms. Një platformë e lehtë për t’u përdorur.
Po si të përgatisin strukturat e brendshme në këtë kohë bizneset? Panelistët ndanë disa ide:
- Tregoni disiplinë në takimet tuaja. Përcaktojini çdo javë me kalendar.
- Përdorni gjithë mjetet teknologjike që janë në dispozicion.
- Përgëzoni ekipin për punët e kryera, festoni virtualisht fitoret e vogla.
- Bëni follow up për projektet e përfunduara.
Por si po punojnë online bizneset?
Tomi dha një shembull të thjeshtë për bizneset që janë mbyllur, si: restorantet dhe lokalet. Ato mund të ofrojnë Kupon Kod, ku klienti e blen tani nga biznesi dhe më vonë merr shërbime më shumë, me një çmim të arsyeshëm.
Gerti theksoi që bizneset duhet të sigurohen të komunikojnë me klientët që kanë ose me bizneset partnere. E rëndësishme është që mos të humbasin lidhjet.
Në webinar u fol edhe për turizmin. Panelistët theksuan se ky sektor duhet të gjenerojë oferta dhe t’i përdorë ato më vonë pasi të kalojë kjo periudhë. Të konsolidojnë proçeset e brendshme. Të ndërtojnë një web nëse nuk e kanë atë akoma. Të përdorin dhe perfeksionojnë mjetet e komunikimit. Të analizojnë se çfarë po kërkohet më së shumti sot në Google.
Lexo: Digjitalizimi nuk është më e ardhmja, por e tashmja
Mesazhi i tyre për sipërmarrësit është:
“Shfrytëzojeni situatën për mundësi pozitive, për ju dhe biznesin tuaj. Mos rrini!” tha Tomi Kallanxhi.
“Ky është një moment i mirë për të reflektuar dhe trajnuar. Shfrytëzoni internetin duke ndjekur kompetitorët. Krijoni një prezencë online e përbërë nga një website, platforma online dhe dedikojuni atyre,” u shpreh Gerti Boshnjaku.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
