Përkundër stereotipeve që shpesh i portretizojnë si të papërgjegjshëm apo të painteresuar për punën, shumë të rinj nga Gen Z – të lindur midis viteve 1997 dhe 2012 po udhëheqin me dëshirë rikthimin në ambientet e punës, duke e parë zyrën si një trampolinë për rritjen e tyre profesionale.
Shumë prej tyre e nisën rrugëtimin e parë në tregun e punës gjatë pandemisë, në një kohë kur puna në distancë u bë normë. Kjo i ekspozoi ndaj kritikave, shpesh nga liderë të njohur biznesi, që i fajësuan për zyrat bosh. Por të dhënat tregojnë të kundërtën: sipas një studimi global me 12,000 punonjës nga kompania JLL, të rinjtë deri në 24 vjeç shkojnë në zyrë mesatarisht tre ditë në javë më shumë se çdo grup tjetërmoshë. Për këtë brez, prania në zyrë nuk ka të bëjë vetëm me përmbushjen e detyrave, por me përvetësimin e kulturës së punës: si të komunikojnë në mënyrë profesionale, si të ndërtojnë marrëdhënie me kolegët e më të vjetrit në moshë, si të mësojnë rregullat e pashkruara të etikës profesionale dhe si të bien në sy të drejtuesve. Shumë të rinj të kësaj gjenerate ndihen se kanë nevojë për këtë lloj ekspozimi, sidomos për shkak të mungesës së përvojës së tyre fizike në mjedise pune gjatë pandemisë. Prania në zyrë ndihmon në zhvillimin e aftësive ndërpersonale dhe përvetësimin e zakoneve të përditshme profesionale që nuk merren dot pas një ekrani kompjuteri.
Për më tepër, për shumë të rinj ambiciozë, zyra është një mundësi për të ndërtuar rrjetin profesional dhe për të mësuar direkt nga drejtuesit. Disa janë të gatshëm të udhëtojnë për orë të tëra çdo ditë dhe të shpenzojnë qindra dollarë në muaj vetëm për të qenë pranë tyre – të dëshmuar, të mësojnë dhe të avancojnë. Gjithsesi, kjo nuk do të thotë që Gen Z refuzon fleksibilitetin. Shumica e tyre mbështesin modelin hibrid të punës – një kombinim mes pranisë fizike dhe punës nga shtëpia – si zgjidhjen më të përshtatshme për të ardhmen. Ata e shohin zyrën si vend ku zhvillojnë karrierën dhe punën në distancë si mjet për të balancuar jetën personale dhe profesionale. Për disa të rinj që përballen me sfida shëndetësore apo personale, puna në distancë përfaqëson gjithashtu një hap të madh drejt përfshirjes dhe aksesit më të barabartë në tregun e punës. Në fund të ditës, ky brez nuk është i painteresuar apo dembel, siç është shpesh paragjykuar. Përkundrazi, ata janë të motivuar nga suksesi, nga rritja profesionale dhe nga dëshira për të provuar veten – në zyrë apo në distancë. Ata kërkojnë mundësi, mentorim dhe feedback për t’u zhvilluar dhe për të ndërtuar një të ardhme më të mirë për veten e tyre.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
