Pas një periudhe rritjeje të pandalshme, çmimi i arit pësoi një goditje të fortë gjatë ditës së djeshme, duke rënë me mbi 5 %, rënia më e madhe në më shumë se dhjetë vjet.
Sot, metali i çmuar ka shënuar një rimëkëmbje të lehtë, me çmimin që arrin 4,141.48 dollarë për ons, ose 0.4 % më shumë krahasuar me një ditë më parë. Të martën, ari kishte zbritur deri në 4,082.03 dollarë për ons, pasi më herët kishte prekur rekordin e ri prej 4,381.21 dollarësh.
Sipas analizës së CNN, kjo rënie lidhet me shitjet për realizim fitimesh nga investitorët, pas një periudhe rritjeje të shpejtë dhe të qëndrueshme. Një tjetër faktor që ndikoi është optimizmi për raundin e ri të negociatave tregtare midis SHBA-së dhe Kinës, i cili uli kërkesën për investime në “asetet e sigurta” si ari. Pavarësisht kësaj luhatjeje, viti 2025 ka qenë jashtëzakonisht i favorshëm për arin, me një rritje vjetore mbi 50 % – një nivel që tejkalon periudhat e krizave globale si ajo e vitit 2008 apo pandemia Covid-19.
Lexo edhe: Patoko dhe Tony’s, historia e një partneriteti inovativ
Vetëm gjatë dy muajve të fundit, çmimet janë rritur me rreth 25 %, të nxitura nga:
- rritja e borxhit publik të SHBA-së,
- pasiguria politike ndërkombëtare,
- pritjet për ulje të normave të interesit nga Rezerva Federale.
Në tregjet e metaleve të tjera të çmuara, argjendi dhe platina pësuan gjithashtu rënie të ndjeshme, përkatësisht me 7 % dhe 5 %.
Analistët theksojnë se tregjet po përjetojnë një fazë “frymëmarrjeje” pas rritjeve të pazakonta, ndërsa sytë janë drejt bisedimeve SHBA–Kinë dhe politikave monetare që mund të përcaktojnë drejtimin e çmimeve në muajt në vijim.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
