Në një intervistë për BusinessMag themeluesja e “Creativity Zone by Stela”, Stela Toska na tregon se prej një viti ka regjistruar biznesin e saj në QKR dhe madje ka hapur edhe dyqanin fizik. Ajo tregton më së shumti produkte të tilla si: gurë, tjegulla dhe dërrasa të ricikluara të pikturuara. Stela gjithashtu ka shumë punime dhe materiale në pritje për t’u punuar dhe që kapin një vlerë konsiderueshëm të lartë.
E pyetur nga BusinessMag nëse i ka realizuar objektivat që kishte vendosur në fillimet e saj Stela na tregon: “Objektivat e mia janë tejkaluar, sepse nuk do e kisha menduar që do arrija kaq larg dhe se mund të bëja këtë rrugëtim që më jep shpresa dhe ide të reja për të ecur përpara çdo ditë.”
Lexoni më shumë: Creativity by Stela: Këmbëngulja për të lëvizur çdo gur nga vendi e çoi përpara sipërmarrjen time!
Vështirësitë që ajo ka hasur më së shumti në të bërit artizanat inovativ janë krijimi i klientelës dhe i tregut, pasi me kohën fillojnë edhe të të kopjojnë artin që bën, por kjo jo në gjithçka pasi Stela mundohet të krijojë punime të reja çdo ditë. Për të, e vështirë ka qenë gjetja e kontakteve që të ishte e pranishme në çdo panair, që realizohen si brenda edhe jashtë vendit. Por me një punë të palodhshme ajo ia ka arritur me sukses të jetë e denjë me pjesëmarrjet e saj.
Me një rrugëtim të shkurtër si biznes startup Stela na tregon se ka marrë mbështetje nga agjencia AIDA me fondin e tyre dhe momentalisht janë në shqyrtim dokumentacioni për financimin e 1000 produkteve të saj nga Bashkia Tiranë, pasi para një viti ka fituar çmimin e inkurajimit në konkursin “Produkte Turistike“.
“Planet e mia sa vijnë e shtohen, bëhen më të mëdha dhe shpresoj që një ditë të arrij t’i realizoj në maksimumin e tyre. Shpresoj tek ata që besojnë në frymën dhe gjakun e ri, shpresoj se do u japin një shans atyre që duan dhe dinë të punojnë. Uroj që të më ndihmojnë në realizimin e këtij projekti madhështor. Besoj në mbështetjen reale të të gjithë artizanëve duke çarë kështu njëherë e përgjithmonë zinxhirin e monopoleve,” thotë Stela për planet e ardhshme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
