Jeff Bezos, përmes fondit të tij të investimeve Bezos Expeditions, ka investuar 72 milionë dollarë në kompaninë e teknologjisë Toloka, e specializuar në trajnimin dhe vlerësimin e modeleve të inteligjencës artificiale (AI). Investimi vjen në një moment kur Toloka po përgatitet për zgjerim të shpejtë në tregun global, me fokus të veçantë në Shtetet e Bashkuara.
Toloka, pjesë e Nebius Group, operon përmes një rrjeti të gjerë bashkëpunëtorësh dhe testuesish njerëzorë që ndihmojnë në përmirësimin e saktësisë së modeleve AI. Kompania ka një histori bashkëpunimesh me emra të mëdhenj si Amazon, Microsoft dhe Anthropic.
Lexo edhe: Si të mos zëvendësoheni nga robotët!
CEO dhe themeluesja e Toloka, Olga Megorskaya, e cilësoi këtë investim si “një moment kthese” për kompaninë, duke shtuar se mbështetja do të përshpejtojë rritjen dhe përmirësimin teknologjik. Ajo theksoi se “ekspertiza njerëzore do të mbetet gjithmonë thelbësore për cilësinë e rezultateve të AI-së.”
Në bordin drejtues të sapokrijuar të Toloka do të përfshihet edhe Mikhail Parakhin, CTO i Shopify, i cili do të marrë rolin e kryetarit ekzekutiv. Parakhin u shpreh i entuziazmuar për potencialin e bashkëpunimit me kompaninë, duke vënë në dukje se “kërkesa për zgjidhje të fuqishme dhe të besueshme në fushën e të dhënave për AI është më e madhe se kurrë më parë.”
Ky investim i ri nga Bezos konsiderohet si një sinjal i qartë se inteligjenca artificiale, veçanërisht segmenti i menaxhimit të të dhënave, mbetet një nga fushat më të nxehta për investime strategjike në teknologji.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
