Policia e Shtetit ka goditur një grup njerëzish që fusnin mallra kontrabandë në vend dhe i shisnin ato në rrjete sociale.
Pesëmbëdhjetë persona kanë rënë në pranga dhe 6 të tjerë janë shpallur në kërkim, pasi tregtonin produkte të ndryshme, të cilat ishin futur kontrabandë në vend dhe nuk jepnin faturë tatimore për shitjet e tyre. Në cilësinë e provës materiale janë sekuestruar sasi të konsiderueshme produktesh (mallrash), të cilat do të tregtoheshin te klientët nëpërmjet postave.
Përmes faqeve online, ata reklamonin dhe tregtonin produkte të ndryshme, të cilat dyshohet se janë futur në Shqipëri kontrabandë, dhe për shitjet e tyre, nuk jepnin faturë tatimore, duke shmangur pagesën e taksave dhe tatimeve.
Materialet i kaluan Prokurorisë pranë Gjykatës së Shkallës së Parë Tiranë, në ngarkim të administratorëve për veprat penale “Kontrabanda me mallra të tjera”, “Fshehja e të ardhurave”, “Mospagimi i taksave dhe tatimeve”, dhe “Shkelja e të drejtave të pronësisë industriale”.
Lexo edhe: Krijohet Shoqata e E-commerce-it Shqiptar
Informaliteti në sektorin e tregtisë online ka qenë një problem i vazhdueshëm, i ngritur edhe nga Shoqata e E-Commerce në vend. Valer Pinderi, themelues dhe anëtar i shoqatës është shprehur kështu në lidhje me fenomenin:
“Ky treg shfaq mundësi të jashtëzakonshme për të gjitha kompanitë që duan të punojnë në këtë treg, por e vetmja zgjidhje është formalizimi i tij, bashkëpunimi me operatorët e tregut si institucionet financiare, subjektet që operojnë në sektorët logjistikë, teknologji, dhe dialogu me institucionet politikë-bërëse në Shqipëri”, – tha Pinderi.
Sipas tij, çdo ditë shpërndahen 17 000 – 20 000 pako nga kompanitë postare drejt klientëve, ku më pak se 30% iu përkasin kompanive që operojnë ligjërisht në treg.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto