Të rinjtë shqiptarë po integrohen me shpejtësi në tregjet globale të punësimit, duke shitur nga Shqipëria shërbimet profesionale në distancë për kompani të huaja. Platforma ndërkombëtare e punësimit online “Upwork” ka të regjistruar aktualisht 3 mijë të rinj shqiptarë, shumica e të cilëve janë paguar.
Numri i regjistrimeve në platformë u rrit me shpejtësi gjatë pandemisë, si një mundësi mbijetese për të rinjtë shqiptarë që humbën vendin e punës nga pandemia në Shqipëri. Në muajin shkurt 2021, në platformën ”Upwork” ishin të regjistruar 1600 shqiptarë, kryesisht të rinj, ndërsa në qershor 2021, numri i regjistrimeve nga Shqipëria i kaloi të 3 mijë personat.
Nga përpunimi i të dhënave shihet se, shumica e tyre janë paguar. Fitimet e të rinjve nga punësimi në distancë përfshijnë pagesa të kënaqshme. Ndërmjet tyre ka persona që kanë fituar me shumë se 100 mijë euro për më pak se dy vjet. Shumica prej tyre kanë siguruar të ardhura mujore rreth 1 mijë euro në muaj që nga periudha e regjistrimit. Ndër të punësuarit në distancë ka edhe të rinj nga Kosova.
Të rinjtë shqiptarë kryesisht ofrojnë shërbime profesionale të tilla si shërbime të teknologjisë së informacionit (TIK) që janë edhe më të paguarat. Po larmia e shërbimeve është shumë e madhe, duke përfshirë konsulenca, analizë risku, arkitekturë, inxhinieri, kontabilitet, përkthim, marketing, përpunim të dhënash, etj.
Lexoni: Të rinjtë shqiptarë zgjedhin teknologjinë dhe inovacionin, 1000 studentët e parë në TUMO!
Platformat e punësimit online u bënë popullore gjatë pandemisë Covid-19. Në këtë periudhë, numri i shqiptarëve të regjistruar në platformat ndërkombëtare të punësimit shënoi rritje më të madhe se në çdo vend tjetër.
Ata janë integruar mirë në tregun e punës në distancë për shkak se, ofrojnë shërbime të ekspertizës së lartë, me pagesë të ulët në krahasim me tregun botëror. P.sh. shumica e të regjistruarve nga Shqipëria ofrojnë punë 10 dollarë në orë, kurse në Europë, shërbimet profesionale për një orë pune kushtojnë jo më pak se 40-50 dollarë.
Për disa shërbime si, arkitektura dhe përkthimi, profesionistët shqiptarë kërkojnë pagesa shumë më të ulëta se kolegët e tyre në rajon dhe në Europë. Sipas të dhënave nga platforma “Upwork”, të rinjtë shqiptarë profesionistë kanë marrë përgjithësisht vlerësime pozitive nga punëdhënësit.
Në një studim të posaçëm për dixhitalizimin gjatë pandemisë, Banka Botërore e vlerësoi e-commerce si një mundësi, jo vetëm për profesionistët shqiptarë, por edhe për kompanitë shqiptare, të cilat mund të shesin prodhimet e tyre në tregje më të mëdha se popullsia e vogël e Shqipërisë prej 2.8 milionë banorësh.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
